អតីតមេដឹកនាំបក្សប្រឆាំង លោក សម រង្ស៊ី បង្ហាញក្ដីសង្ឃឹមថា លោកនឹងមានវត្តមានក្នុងប្រទេសកម្ពុជានៅថ្ងៃទី៩វិច្ឆិកា តាមការគ្រោងទុក ទោះបក្សកាន់អំណាចប្រកាសពីវិធានការទប់ស្កាត់ក៏ដោយ។
នៅប៉ុន្មានសប្តាហ៍នេះ កម្លាំងប្រដាប់អាវុធត្រូវបានគេដាក់ពង្រាយតាមព្រំដែនថៃ និងកន្លែងខ្លះនៅក្នុងប្រទេសក្រោមសារនយោបាយ ទប់ស្កាត់ការធ្វើរដ្ឋប្រហារទម្លាក់រដ្ឋាភិបាល របស់លោក ហ៊ុន សែន ។
ជាងនេះទៅទៀត រដ្ឋាភិបាលបានណែនាំក្រុមហ៊ុនអាកាសចរទាំងអស់មិនឱ្យដឹកលោក សម រង្ស៊ី មកចុះចតលើទឹកដីកម្ពុជាទេ ដោយគំរាមថានឹងជាប់ចោទពីបទ«រួមគំនិតក្បត់»។
តាមវីដេអូបង្ហោះលើហ្វេសប៊ុករយៈពេលជាង៩នាទី លោក សម រង្ស៊ី ថ្លែងថា នៅសល់តែ៥ថ្ងៃទៀតប៉ុណ្ណោះ លោកនឹងមកដល់កម្ពុជាតាមការគ្រោងទុក ទោះមានការគំរាមកំហែងពីលោក ហ៊ុន សែន យ៉ាងណាក៏ដោយ។
លោកថា៖ «ឥឡូវនេះ គេ [រដ្ឋាភិបាល] បានហាមក្រុមហ៊ុនអាកាសចរថាមិនឱ្យដឹក សម រង្ស៊ី តាមយន្តហោះ ដើម្បីទៅចុះនៅព្រលានយន្តហោះណាមួយទៅប្រទេសកម្ពុជា តែបងប្អូនកូនក្មួយកុំបារម្ភ ខ្ញុំនឹងរកមធ្យោបាយវិលត្រឡប់ទៅរកប្រទេសកំណើតរបស់យើងនេះឱ្យទាល់តែបាន»។
លោក សម រង្ស៊ី អះអាងថា វិធានការទប់ស្កាត់ដំណើរវិលត្រឡប់របស់លោក ជារូបភាពភ័យស្លន់ស្លោរបស់មេដឹកនាំបក្សកាន់អំណាច ខ្លាចចរន្តប្រជាធិបតេយ្យដែលថាកំពុងជំរុញឱ្យមានការផ្លាស់ប្តូរមេដឹកនាំ។
លោក សម រង្ស៊ី អះអាងទៀតថា ការរួមគ្នាដោយមនសិការជាតិ ការតស៊ូដោយសន្តិវិធី ជាកម្លាំងមួយគ្មាននរណាអាចទប់ស្កាត់បាន។
រដ្ឋមន្ត្រីក្រសួងការពារជាតិ លោក ទៀ បាញ់ ប្រាប់ក្រុមអ្នកសារព័ត៌មាននៅមន្ទីររដ្ឋសភានាថ្ងៃចន្ទនេះថា វិធានការដាក់ពង្រាយកងទ័ពនៅគ្រប់ទីកន្លែងពេលនេះ ដើម្បីការពារដ្ឋាភិបាល ទប់ស្កាប់គម្រោងធ្វើរដ្ឋប្រហារ។
លោកថា៖ «អ្នកដែលបង្កើតរឿងគឺជាទណ្ឌិត [សម រង្ស៊ី]។ ទណ្ឌិត បង្កើតរឿងបន្ថែមទៀតគឺបំផុសបំផុលឱ្យធ្វើរដ្ឋប្រហារ ឥឡូវហ្នឹងគឺនៅគ្រប់ទីកន្លែងទាំងអស់ គឺបានបញ្ជាក់ហើយគឺត្រៀមអនុវត្តដីការបស់តុលាការដែលមានស្រាប់ចំពោះទណ្ឌិត និងអ្នកសមគំនិត»។
ទោះជាយ៉ាងណា លោក សម រង្ស៊ី អះអាងថាកងកម្លាំងប្រដាប់អាវុធនឹងមិនបាញ់សម្លាប់ពលរដ្ឋខ្មែរ តាមបញ្ហារបស់មនុស្សមួយក្រុមនោះទេ ដោយអះអាងថា កងកម្លាំងមានឈាមជ័រជាខ្មែរដូចគ្នា។
អ្នកនាំពាក្យគណបក្សប្រជាជនកម្ពុជា លោក សុខ ឥសាន ហៅសារអំពាវនាវរបស់លោក សម រង្ស៊ី នេះថាជាសារនយោបាយបែបបោកបញ្ឆោតថ្មីទៀតពីដំណើរវិលត្រឡប់នេះ និងបានច្រានចោលការអះអាងថាមេដឹកនាំលោក កំពុងភ័យស្លន់ស្លោ ពីវត្តមានរបស់អតីតមេដឹកនំបក្សប្រឆាំងរូបនេះ។
លោកថា៖ «ភ័យស្លន់ស្លោ គេនៅចាំក្នុងស្រុកតើ គេមានរត់ទៅក្រៅស្រុកឯណា? បើរត់ទៅក្រៅស្រុកចាំថា! សម្តេច ហ៊ុន សែន ទៅប៉ុន្មានថ្ងៃនេះទៅប្រជុំអាស៊ាននៅប្រទេសថៃតើ! ប្រហែលជាល្ងាចនេះ ឬស្អែកគាត់អញ្ជើញមកវិញហើយ គាត់មានទៅភ័យស្លន់ស្លោអីជាមួយពួកឧទ្ទាម»។
ទោះជាយ៉ាងណា អ្នកជំនាញសិទ្ធិមនុស្សអង្គការសហប្រជាជាតិ លោកស្រី រ៉ូណា ស្មីត ក្នុងកិច្ចប្រជុំលើកទី៤២ របស់ក្រុមប្រឹក្សាសិទ្ធិមនុស្សអង្គការសហប្រជាជាតិ នៅទីក្រុងហ្សឺណែវ ប្រទេសស្វ៊ីស បានអំពាវនាវឱ្យអ្នកនយោបាយខ្មែរ ផ្តោតលើការជជែកវែកញែកគ្នា ប្រកបដោយការស្ថាបនា ជាជាងការវាយប្រហារលើបុគ្គល ដើម្បីទទួលបានសន្តិភាព និងការអភិវឌ្ឍប្រកបដោយចីរភាព។
បើតាមការថ្លែងនោះ សំឡេងឆ្នោតចំនួន៤២ភាគរយនៃចំនួនប្រជាជនដែលបានបោះឆ្នោតឱ្យគណបក្សសង្គ្រោះជាតិ នៅថ្នាក់ឃុំ សង្កាត់ (ឆ្នាំ២០១៧) នៅតែត្រូវបានបដិសេធចោលមិនទាន់ដោះស្រាយនៅឡើយ៕
