កងកម្លាំងចម្រុះជិត២ម៉ឺននាក់នឹងត្រូវដាក់ពង្រាយក្នុងថ្ងៃបុណ្យឯករាជ្យ និងបុណ្យអំទូក។ នេះបើតាមការបញ្ជាក់របស់មន្ត្រីជាន់ខ្ពស់អគ្គស្នងការនគរបាលជាតិ ដែលថ្លែងប្រាប់ វីអូឌី នៅថ្ងៃនេះ។
ថ្នាក់ដឹកនាំកម្លាំងប្រដាប់អាវុធកម្ពុជាបានទម្លាយប្រាប់អ្នកកាសែតថា សន្តិសុខនឹងត្រូវរឹតបន្តឹងចាប់ពីថ្ងៃទី០៩ ខែវិច្ឆកា ដែលជាថ្ងៃបុណ្យឯករាជ្យជាតិ និងជាថ្ងៃកំណត់វិលចូលប្រទេសវិញរបស់លោក សម រង្ស៊ី។ មិនតែប៉ុណ្ណោះ ពិធីបុណ្យអុំទូក អកអំបុក និងសំពះព្រះខែនៅឆ្នាំនេះ ក៏ត្រូវនឹងត្រូវរឹតបន្តឹងសន្តិសុខខ្លាំងក្លាជាងបណ្ដាឆ្នាំមុនៗដែរ។
អ្នកនាំពាក្យអគ្គស្នងការនគរបាលជាតិ លោក ឆាយ គឹមឃឿន មានប្រសាសន៍ថា កងកម្លាំងប្រដាប់អាវុធបានដាក់ផែនការរួចរាល់ហើយ ដើម្បីរក្សាសណ្ដាប់ធ្នាប់ក្នុងអំឡុងបុណ្យឯករាជ្យជាតិ៩វិច្ឆិកា និងព្រះរាជពិធីបុណ្យអុំទូកអកអំបុក និងសំពះព្រះខែខាងមុខ ។
លោក ឆាយ គឹមឃឿន ថា៖ «កម្លាំងការពារពិធីបុណ្យគ្រប់សមាសភាពពាក់ព័ន្ធ ទាំងអស់សរុបជិត២ម៉ឺននាក់។ អត់អាចជម្រាបជូនបានកម្លាំងរៀបរបៀបណារបៀបណាទេ តែសមត្ថកិច្ចបានរៀបផែនការរួចរាល់អស់ហើយ រួមមានផែនការត្រៀមចាប់ខ្លួន ផែនការធានាសុវត្ថិភាពសន្តិសុខនៅតាមព្រំដែន ផែនការការពារបុណ្យឯករាជ្យជាតិ និងផែនការបុណ្យអុំទូក។ ក្នុងផែនការនោះ យើងកំណត់មុខសញ្ញាគោលដៅ ទីកន្លែង កម្លាំងដើម្បីធានាស្ថិរភាពសន្តិសុខសម្រាប់ការអនុម័តច្បាប់ចំពោះក្រុមឧទ្ទាមផង និងធានាសន្តិសុខទូទាំងប្រទេសផង«។
លោកបញ្ជាក់ថា កងកម្លាំងប្រដាប់អាវុធទាំងបីផ្នែក រួមមាន នគរបាល អាវុធហត្ថ និងយោធា នៅគ្រប់បណ្ដាខេត្តទាំងអស់ នឹងសហការគ្នាហ្វឹកហាត់តាមបណ្ដាខេត្តរៀងៗខ្លួនពិសេសខេត្តជាប់ព្រំដែនថៃ ដើម្បីឆ្លើយតបនឹងចលនារបស់លោក សម រង្ស៊ី។
ទន្ទឹមការអះអាងបែបនេះ នៅតាមបណ្ដោយព្រំដែនកម្ពុជាថៃវិញមេទ័ពព្រំដែន បានបំពាក់អាវុធឱ្យកងកម្លាំងរួចរាល់ហើយចាប់ពីចុងខែតុលា មកដល់ថ្ងៃទី០៤ ខែវិច្ឆិកានេះ។ ទំព័រហ្វេសប៊ុករបស់ការិយាល័យទំនាក់ទំនងព្រំដែនកម្ពុជា-ថៃ បានផ្សាយជាបន្តបន្ទាប់តាំងពីថ្ងៃទី៣០ ខែតុលា ពីសកម្មភាពរបស់នាយករងទីចាត់ការការងារព្រំដែនអគ្គបញ្ជាការ និងជាប្រធានការិយាល័យទំនាក់ទំនងព្រំដែនកម្ពុជា-ថៃ គឺឧត្តមសេនីយ៍ទោ ពេជ្រ វណ្ណា ទៅកាន់ច្រកព្រំដែននានា ។ បើតាមផេកហ្វេសប៊ុកដដែល កាលពីថ្ងៃទី៣០ ខែតុលា ឧត្តមសេនីយ៍ ពេជ្រ វណ្ណា បានចុះត្រួតពិនិត្យក្រុមការងារទំនាក់ទំនងព្រំដែនកម្ពុជា-ថៃ ច្រកទ្វារតំបន់ បឹងត្រកួន ។ នៅថ្ងៃទី៣១ ខែតុលា មេទ័ពរូបនេះបានចុះទៅច្រកព្រំដែនចំនួន៥ រួមមាន ច្រកទ្វារតំបន់ភ្នំដី ច្រកទ្វារតំបន់អូររំដួល ច្រកទ្វារតំបន់អូរអន្លក់ ច្រកអន្តរជាតិដូង និងច្រកអន្តរជាតិព្រំ (ប៉ៃលិន)។
ឧត្តមសេនីយ៍ទោរូបនេះ ក៏បានចុះទៅច្រកតំបន់សែនចៅ, ច្រកតំបន់៤០០, ច្រកតំបន់២០៣ និងច្រកតំបន់ពាមតា នៅក្នុងទិសស្រុកសំឡូត ខេត្តបាត់ដំបង នៅថ្ងៃទី០១ ខែវិច្ឆិកា និងបន្តដំណើរទៅច្រកចំនួន៥ទៀតនៅខេត្តឧត្តរមានជ័យ នៅថ្ងៃទី០២ ខែវិច្ឆកា។
ហ្វេសប៊ុកទំព័រហ្វេសប៊ុករបស់ការិយាល័យទំនាក់ទំនងព្រំដែនកម្ពុជា-ថៃ បានបញ្ជាក់ពីគោលបំណងនៃទស្សនៈកិច្ចរបស់លោក ពេជ្រ វណ្ណា ទៅកាន់ច្រកព្រំដែនថា ៖ «គឺធ្វើឡើងដើម្បីពង្រឹងការងារធានា គ្រប់គ្រងកំលាំងនៅក្នុងអង្គភាពមានមុខ ១០០% និងបំពាក់អាវុធដល់កងកំលាំងក្រុមការងារ ដើម្បីការពារ និងទប់ស្កាត់ជនក្បត់ជាតិ ទណ្ឌិត សម រង្សី និងបក្សពួក ដែលមានគំនិតប៉ុនប៉ងផ្តួលរំលំរាជរដ្ឋាភិបាលស្របច្បាប់» ។
កាលពីថ្ងៃទី០៣ ខែវិច្ឆិកា មេបញ្ជាការកងរាជអាវុធហត្ថលើផ្ទៃប្រទេស លោក សៅ សុខា បានចេញបញ្ជាផ្ទាល់មាត់ទៅកាន់កម្លាំងអាវុធហត្ថឱ្យត្រៀមទប់ស្កាត់ចលនារបស់លោក សម រង្ស៊ី។ អង្គភាពព័ត៌មានហ្វេសញ៉ូស៍ដែលស្និទ្ធនឹងបក្សកាន់អំណាច ស្រង់ប្រសាសន៍ដើមរបស់លោក សៅ សុខា ថា៖
«មេបញ្ជាការកងរាជអាវុធហត្ថរាជធានីភ្នំពេញ, ខេត្តព្រះសីហនុ, ខេត្តសៀមរាប ខេត្តទាំងបីនេះ ត្រូវត្រៀមកម្លាំងសហការជាមួយនឹងកម្លាំងនគរបាលជាតិ។ កម្លាំងដែលមានការពាក់ព័ន្ធអនុវត្តបទបញ្ជារបស់គណៈបញ្ជាការឯកភាពខេត្ត ត្រៀមកម្លាំងបំពាក់(អាវុធ)គ្រប់គ្រាន់ ចូលរួមប្រចាំការនៅបណ្ដាព្រលានយន្ដហោះទាំងបី ហើយមានអ្វីប្រែប្រួលត្រូវរាយការណ៍ ដោយចាប់ពីថ្ងៃនេះទៅភ្លាមត្រៀមរៀបចំកម្លាំងអនុវត្តបទបញ្ជា»។
បើតាមប្រភពដដែល លោក សៅ សុខា ក៏បានដាក់បញ្ជា ឱ្យមេបញ្ជាការអាវុធហត្ថខេត្តជាប់មាត់សមុទ្រ រួមមាន ខេត្តព្រះសីហនុ ខេត្តកោះកុង ខេត្តកំពត ខេត្តកែប ត្រូវត្រៀមកម្លាំង ដើម្បីអនុវត្តបទបញ្ជា ក្នុងករណីដែលលោក សម រង្ស៊ី ប៉ុនប៉ងចូលកម្ពុជាមកតាមផ្លូវទឹក។
រដ្ឋមន្ត្រីក្រសួងការពារជាតិ លោក ទៀ បាញ់ ថ្លែងប្រាប់សារព័ត៌មានបន្ទាប់ពីប្រជុំសភាកាលព្រឹកមិញថា ការត្រៀមកម្លាំងគ្រប់ផ្នែកក្នុងខែវិច្ឆិកានេះ ជាការងារពិសេសចាំបាច់ដែលសមត្ថកិច្ចគ្រប់ស្ថាប័នត្រូវរួមគ្នាធ្វើឱ្យខាងតែបាន។
លោក ទៀ បាញ់ លើកឡើងថា៖ «នៅគ្រប់ទីកន្លែងទាំងអស់ យើងត្រៀមរួចរាល់អស់ហើយ ដើម្បីអនុវត្តដីកាចំពោះទណ្ឌិត និងអ្នកសមគំនិត និងគាំទ្រ»។
ទាក់ទងនឹងការត្រៀមកម្លាំងរបស់រដ្ឋាភិបាលនេះ អតីតគណបក្សសង្គ្រោះជាតិបានចេញសេចក្ដីថ្លែងការណ៍មួយកាលពីថ្ងៃទី០២ ខែវិច្ឆិកា ដោយថ្កោលទោស ចំពោះគណបក្សកាន់អំណាច ដែលបានប្រើប្រាស់កងកម្លាំងប្រដាប់អាវុធគ្រប់ប្រភេទ រួមទាំងអាជ្ញាធរអាកាសចរណ៍ស៊ីវិលកម្ពុជា ក្នុងការរារាំង និងទប់ស្កាត់ការធ្វើមាតុភូមិនិវត្តិន៍របស់ថ្នាក់ដឹកនាំគណបក្សសង្រ្គោះជាតិ ដឹកនាំដោយលោក សម រង្ស៊ី។
អ្នកឃ្លាំមើលបញ្ហានយោបាយ លោកបណ្ឌិត ឡៅ ម៉ុងហៃ មានប្រសាសន៍ថា ការត្រៀមកម្លាំងប្រដាប់អាវុធទាំងទប់ស្កាត់ លោក សម រង្ស៊ី ហាក់ដូចជាត្រៀមធ្វើសង្គ្រាមជាជាងត្រៀមរក្សាសន្តិសុខ។
លោក ឡៅ ម៉ុងហៃ មានប្រសាសន៍ថា ៖ «គឺសម្តេចតេជោជាមេបញ្ជាការកងទ័ព បញ្ជាអ៊ីចឹងទប់ទល់ការវិលត្រឡប់របស់ សម រង្ស៊ី ដោយចោទថា សម រង្ស៊ី ចង់ធ្វើរដ្ឋប្រហារផ្តួលរំលំរដ្ឋាភិបាល និងព្រះមហាក្សត្រ ដូច្នេះ វាជាសឹកសង្គ្រាមតែមិនប្រាកាសថាធ្វើសង្គ្រាមទេ»។
នៅថ្ងៃទី០៥ ខែវិច្ឆកានេះ លោក សម រង្ស៊ី ប្រកាសថានឹងដឹកនាំកម្លាំងសហការី និងអ្នកគាំទ្រចូលស្រុកវិញនៅថ្ងៃទី០៩ ខែវិច្ឆិកា ជាកំណត់គ្មានការប្រែប្រួលឡើយ។ បើតាមមន្ត្រីអតីតបក្សសង្គ្រោះជាតិ គិតមកដល់ថ្ងៃទី០២ វិច្ឆិកានេះ សកម្មជនគាំទ្រលោក សម រង្ស៊ី និងសមាជិកអតីតបក្សប្រឆាំងប្រមាណ៦០នាក់ហើយត្រូវបានចាប់ខ្លួនដាក់គុក ខណៈមនុស្សជាង១រយនាក់ផ្សេងទៀតត្រូវចោទប្រកាន់ដោយតុលាការ៕