អ្នកឃ្លាំមើលសិទ្ធិមនុស្សទាមទារឱ្យសមត្ថកិច្ចខេត្តស្វាយរៀង ទទួលខុសត្រូវលើករណីស្លាប់បងស្រីអតីតសកម្មជនគណបក្សប្រឆាំងម្នាក់ ដែលអះអាងថា បានធ្លាក់ពីលើម៉ូតូសមត្ថកិច្ចបោកក្បាលស្លាប់ អំឡុងពេលនាំខ្លួនទៅសាកសួរ ពាក់ព័ន្ធទៅនឹងជម្លោះក្នុងគ្រួសារ ។
បើតាមក្រុមគ្រួសារ សពអ្នកស្រី សំ បុប្ផា ត្រូវបានបូជាហើយកាលពីថ្ងៃព្រហស្បតិ៍ម្សិលមិញ ក្រោយពីគាត់ស្លាប់ដោយសារធ្លាក់ពីលើម៉ូតូសមត្ថកិច្ចពេលនាំខ្លួនទៅសាកសួរនៅសាលាឃុំពាក់ព័ន្ធជម្លោះក្នុងគ្រួសារ។
បើតាមលោក សំ ឌីណា ដែលអះអាងថា ជាប្អូនប្រុសបង្កើតរបស់សពអ្នកស្រី សំ បុប្ផា អាយុ៤៩ឆ្នាំ មានកូន៤នាក់ រស់នៅភូមិក្បាលថ្នល់ ឃុំត្នោត ស្រុកកំពង់រោទិ៍ ខេត្តស្វាយរៀង ។
ស្ត្រីរូបនេះ មានប្អូនប្រុសបង្កើតម្នាក់ទៀតឈ្មោះ សំ រត្នី ដែលលោក សំ រត្នី ជាអតីតក្រុមប្រឹក្សាខេត្តស្វាយរៀងរបស់គណបក្សសង្គ្រោះជាតិ។
អ្នកនាំពាក្យសមាគមអាដហុកការពារសិទ្ធិមនុស្ស លោក ស៊ឹង សែន ករុណា និយាយថា ការស្លាប់នេះ មន្ត្រីពាក់ព័ន្ធអះអាងថា ស្ត្រីនោះបានលោតចុះពីលើម៉ូតូដោយខ្លួនឯង ពេលសមត្ថកិច្ចកំពុងព្យាយាមដឹកទៅសាលាឃុំដើម្បីសាកសួរ។ ប៉ុន្តែ លោកថា ករណីនេះ សមត្ថកិច្ចជាអ្នកទទួលខុសត្រូវចំពោះមុខច្បាប់។
លោកថា៖ «ប្រធាននគរបាលយុត្តិធម៌ប្រចាំខេត្តហ្នឹង ត្រូវតែបើកការស៊ើបអង្កេតឲ្យបានច្បាស់អំពីករណីស្លាប់ហ្នឹង។ ហើយបញ្ជូនសំណុំរឿងតាមនីតិវិធីទៅតុលាការ ដើម្បីឲ្យសារធារណជនគេបានដឹងអំពីចំណាត់ការហ្នឹង ដែលសមត្ថកិច្ចបានយកចិត្តទុកដាក់។ ប្រសិនបើជាអត់យកចិត្តទុកដាក់ គេនឹងចោទប្រកាន់យើងថា រើសអើងក្នុងការអនុវត្តច្បាប់បែបស្តង់ដារពីរដូចពេលកន្លងមកហ្នឹងគឺអត់ខុសទេ»។
ប្រហាក់ប្រហែលគ្នានេះដែរ មន្ត្រីសម្របសម្រួលរបស់អង្គការលីកាដូប្រចាំខេត្តស្វាយរៀង លោក នុត បូពិណ្ណារ័ត្ន មានប្រសាសន៍ថា ការស្លាប់របស់ស្ដ្រី សំ បុប្ផា នេះ ជាការទទួលខុសត្រូវរបស់សមត្ថកិច្ចពាក់ព័ន្ធ។
លោកថា៖ «ធម្មតាកាលដឹកគាត់ គេត្រូវមានម្នាក់អោបគាត់ជាប់ពីក្រោយ។ អញ្ចឹងកំហុសហ្នឹងជាកំហុសបច្ចេកទេសក្នុងការនាំជនសង្ស័យមកសាកសួរ។ អញ្ចឹង អាហ្នឹងជាការទទួលខុសត្រូវរបស់ប៉ូលីសហើយ»។
បើតាមមន្ត្រីសង្គមស៊ីវិល ព្រះរាជអាជ្ញាអមសាលាដំបូងខេត្តស្វាយរៀងផ្ទាល់ ជាអ្នកដើតួនាទីសំខាន់ក្នុងការស្វែងរកយុត្តិធម៌ឱ្យស្ត្រីដែលបានស្លាប់។
អ្នកនាំពាក្យសាលាដំបូងខេត្តស្វាយរៀង លោក ទេព ផល្លា អះអាងថា ព្រះរាជអាជ្ញានឹងដំណើរការនីតិវិធីផ្លូវច្បាប់ករណីនេះ ពេលទទួលបានសំណុំរឿងបញ្ជាក់ពីនគរបាលយុត្តិធម៌។
លោកថា៖ «ជានីតិវិធី កាលណាមានបទព្រហ្មទណ្ឌកើតឡើងអ៊ីចឹង មន្ត្រីយុត្តិធម៌ហ្នឹងត្រូវចាត់ចែងស៊ើបអង្កេតលើរឿងក្តីហ្នឹងសិន ស្ថិតក្រោមការសម្របសម្រួលរបស់ព្រះរាជអាជ្ញា។ ក្រោយពីការស៊ើបអង្កេតបឋមចប់ នគរបាលយុត្តិធម៌ត្រូវជូនសំណុំរឿងនឹងមកព្រះរាជអាជ្ញា ប្តឹងចោទប្រកាន់មកចៅក្រមស៊ើបសួរយ៉ាងម៉េចៗ អាហ្នឹងតាមនីតិវិធីច្បាប់»។
អធិការរងផ្នែកព្រហ្មទណ្ឌ លោក ហ៊ីង សុខា បានច្រានចោលការទទួលខុសត្រូវលើការចាត់វិធានការទៅលើមន្ត្រីដែលធ្វើឲ្យជនសង្ស័យស្លាប់អំឡុងពេលនាំខ្លួនទៅសាកសួរ។
លោកថា៖ «អារឿងចាត់វិធានការមិនមែនជាសមត្ថកិច្ចរបស់ខ្ញុំទេ សុំទោស»។
អ្នកនាំពាក្សអគ្គស្នងការនគរបាលជាតិ លោក ឆាយ គឹមឃឿន អះអាងថា វិធានការច្បាប់ទៅលើមន្ត្រី ដែលធ្វើឱ្យជនសង្ស័យស្លាប់អំឡុងពេលនាំទៅសាកសួរនេះ អាស្រ័យលើការរកឃើញកំហុសពីតុលាការ។
មេធាវី លោក សេក សោភ័ណ្ឌ ពន្យល់ថា តាមនីតិវិធីច្បាប់ ការនាំខ្លួនជនសង្ស័យណាមួយទៅសាកសួរត្រូវបង្ហាញដីកាពីតុលាការ ឬត្រូវមានវត្តមានព្រះរាជអាជ្ញានៅកន្លែងកើតហេតុ។ លោកបន្តថា បើការនាំខ្លួនជនសង្ស័យណាមួយអនុវត្តខុសពីនេះ ជាការមិនគោរពច្បាប់។
មេធាវីរូបនេះ ពន្យល់ផ្លូវច្បាប់ទៀតថា ករណីធ្វើឱ្យជនសង្ស័យស្លាប់ពេលអំឡុងពេលនាំខ្លួនទៅសាកសួរ សមត្ថកិច្ចត្រូវប្រឈមមុខច្បាប់ពីទោសព្រហ្មទណ្ឌ។
លោកថា៖ «ការបាត់បង់ជីវិតរបស់គាត់ [ អ្នកស្រី សំ បុប្ផា] ដោយសាអំពើរបស់អ្នកណាហ្នឹងជាសមត្ថកិច្ចរបស់តុលាការ អត់អាចរួចខ្លួនទេ។ ហើយអ្នកដែលជាប់សង្ស័យជាងគេហ្នឹងគឺសមត្ថកិច្ចហ្នឹង ព្រោះរឿងបាត់បង់ជីវិតជារឿងព្រហ្មទណ្ឌមិនមែនរឿងរដ្ឋប្បវេណី»។
ទោះជាយ៉ាងណា សង្គមស៊ីវិលផ្ដល់ជាយោបល់ថា ដើម្បីកុំឱ្យសហគមន៍ជាតិ និងអន្តរជាតិមើលឃើញថា រដ្ឋាភិបាល ប្រើប្រព័ន្ធយុត្តិធម៌ធ្វើជាឧបករណ៍នយោបាយនោះ ត្រូវមានវិធានការដាក់ពិន័យ ឬផ្តន្ទាទោសមន្ត្រីដែលបំពានច្បាប់ ដើម្បីជំរុញយន្តការពង្រឹងនីតិរដ្ឋ ដូចមានចែងក្នុងរដ្ឋធម្មនុញ្ញ៕