រដ្ឋាភិបាលកម្ពុជាតាមរយៈការគាំទ្ររបស់កម្មវិធីអភិវឌ្ឍន៍សហប្រជាជាតិ UNDP កំពុងរៀបចំគោលនយោបាយជាតិដំឡូងមី ដោយរំពឹងថា អនាគតដំឡូងមីនៅកម្ពុជានឹងផ្ដល់ផលចំណេញច្រើន។
រដ្ឋលេខាធិការក្រសួងពាណិជ្ជកម្ម លោក ម៉ៅ ថូរ៉ា បានលើកឡើងក្នុងពិធីប្រកាសផ្សព្វផ្សាយរបាយការណ៍ស្ដីពីការរៀបចំករណីវិនិយោគសម្រាប់ដំឡូងមីនៅព្រឹកនេះថា ក្រសួងពាណិជ្ជកម្មកំពុងសិក្សាលើការរៀបចំគោលនយោបាយជាតិដំឡូងមី ខណៈទទួលបានការឯកភាពលើខ្លឹមសារដោយទីស្ដីការគណៈរដ្ឋមន្ត្រីហើយ។
លោកថា៖ « រឿងដែលនៅស្ទះនោះគឺថា ខ្លឹមសារគេឯកភាពគ្នាអស់ហើយ វានៅតែទម្រង់។ ដូច្នេះ យើងប្រជុំគ្នា ខ្ញុំគិតថា បើសិនជាយើងអាចអញ្ជើញក្រសួងមួយចំនួនចូលជួយឱ្យយោបល់ប្រហែលជាស្រួល តែកុំទាញ(ខ្លឹមសារ) ឱ្យតែទាញទៅរឿងអីផ្សេងៗចុះឡើងៗ វាយឺតទៀតអត់បានឆ្លងទេ។ ទាល់តែឯកភាពគ្នាតាមការណែនាំពីគណៈរដ្ឋមន្ត្រី ដល់ពេលយើងទៅឆ្លងអន្តរក្រសួង វាលឿន » ។
អ្នកតំណាង UNDP ប្រចាំកម្ពុជា លោក Nick Beresford មានប្រសាសន៍ថា ការចាប់យកការអភិវឌ្ឍផលិតកម្មដំឡូងមីនៅពេលនេះ វានឹងផ្ដល់ប្រយោជន៍គុណនឹងបីក្នុងរយៈពេល១០ឆ្នាំទៀត ដែលជួយដល់កម្ពុជាក្នុងការកាត់បន្ថយភាពក្រីក្រ បង្កើនកំណើនសេដ្ឋកិច្ច និងផ្ដល់ការងារដល់ពលរដ្ឋជាច្រើនផងដែរ។
លោកថា៖ « របាយការណ៍បានរកឃើញថា កំណើនសេដ្ឋកិច្ចសង្គមនឹងកើនឡើងតាមរយៈការកើនឡើងនៃការងារ និងកាត់បន្ថយភាពក្រីក្រ ដែលមានអំណោយផលច្រើនពីការវិនិយោគលើដំឡូងមី។ ការវិភាគបង្ហាញថា ការវិនិយោគកាន់តែច្រើនលើដំឡូងមី វានឹងបង្កើនចំណូលច្រើនដល់កសិករដែលមានដីតិចតួច និងមិនសូវមានជំនាញ (បើប្រៀបធៀបនឹងផ្នែកផ្សេងទៀត) » ។
ប្រធានគម្រោង UNDP លោក លាង រ័ត្នម៉ាណា មានប្រសាសន៍ថា បច្ចុប្បន្ន ទីផ្សារដំឡូងមីកំពុងតែកើនឡើងទាំងតម្លៃ និងតម្រូវការនៅលើពិភពលោក ហើយប្រទេសចិនជាអ្នកទទួលទិញធំជាងគេ ខណៈអ្នកទទួលប្រយោជន៍ច្រើននោះគឺប្រទេសថៃ និងវៀតណាម។ លោកបន្ថែមថា ដល់ពេលហើយដែលកម្ពុជាគួរទាញប្រយោជន៍ពីដំឡូងមីនេះដោយផ្ទាល់ ដោយមិនចាំបាច់ពឹងលើប្រទេសថៃ និងវៀតណាម។
លោក លាង រ័ត្នម៉ាណា៖ « ប្រទេសផ្សេងៗជាពិសេសប្រទេសថៃបានប្រមូលហើយកេងចំណេញអំពីចំណុចពិសេសរបស់ម្សៅដំឡូងមីក្នុងការពង្រីកទីផ្សារពិភពលោក ហើយធ្វើឱ្យមានការលូតលាស់នៅក្នុងឧស្សាហកម្ម។ នៅខណៈពេលដែលយើងផលិតកម្មកើនឡើង តែនិរន្តរភាពនៃផលិតកម្មស្ថិតក្នុងស្ថានភាពដែលគួរឱ្យព្រួយបារម្ភ ហើយឧស្សាហកម្មដែលកើតឡើងរបស់យើងស្ថិតក្នុងស្ថានភាពដែលលិចលង់ » ។
ក្នុងរបាយការណ៍ករណីការរៀបចំការវិនិយោគសម្រាប់ដំឡូងមី ចេញផ្សាយនៅថ្ងៃនេះ UNDP បានរកឃើញថាការវិនិយោគលើដំឡូងមីធ្វើឱ្យកម្ពុជាទទួលបានផលចំណេញច្រើនជាងការវិនិយោគលើជម្រើសផ្សេងទៀត ដូចជា វិស័យស្រូវ វិស័យចិញ្ចឹមសត្វ ស្បៀងអាហារ និងវិស័យទេសចរណ៍ ជាដើម ទោះជាយ៉ាងណារដ្ឋាភិបាលកម្ពុជានៅមិនទាន់បង្ហាញទស្សនៈច្បាស់លាស់លើការវិនិយោគលើដំណាំនេះនៅឡើយទេ។
ក្នុងរបាយការណ៍នោះសរសេរថា៖ « ការដាក់ទុនវិនិយោគលើវិស័យដំឡូងមីចំនួន២៩៤លានដុល្លារ វិស័យដំឡូងមីនឹងរីកចំរើនជាងវិស័យចិញ្ចឹមសត្វ ស្បៀងអាហារ និងទេសចរណ៍។ វានឹងមានលទ្ធផលដូចការវិនិយោគលើស្រូវអង្ករដែរ។ ហើយផលត្រលប់វិញនឹងធ្វើឱ្យកម្ពុជាចំណេញដល់ទៅបីដង ហើយបើគិតពីផលចំណេញសេដ្ឋកិច្ចវិញគឺមិនតិចជាង៩៤០លានដុល្លារទេក្នុងរយៈពេល១០ឆ្នាំ » ។
UNDP ឱ្យជាយោបល់ថា រដ្ឋាភិបាលកម្ពុជាគួរទម្លាក់កញ្ចប់ថវិកាចំនួន២៩៦លានដុល្លារ ដើម្បីអភិវឌ្ឍវិស័យនេះ ដោយគាំទ្រឱ្យមានរោងចក្រឧស្សាហកម្មកែច្នៃ និងរៀបចំហេដ្ឋារចនាសម្ព័ន្ធជាអាទិភាព គួរបង្កើតសំណុំទិន្នន័យ និងធ្វើបច្ចុប្បន្នភាពវិភាគសេដ្ឋកិច្ច និងវាយតម្លៃពីផលប៉ះពាល់បរិស្ថានដើម្បីតាមដានផងដែរ។
របាយការណ៍ក្រសួងកសិកម្មបង្ហាញថា បច្ចុប្បន្ន ប្រទេសវៀតណាម និងថៃ គឺជាទីផ្សារធំជាងគេនៃដំណាំដំឡូងមីកម្ពុជា ខណៈក្នុងរយៈពេល១០ខែនៃឆ្នាំ២០១៩នេះ កម្ពុជានាំចេញដំឡូងមីទាំងក្រៀម ស្រស់ និងម្សៅ ទៅលក់ក្រៅប្រទេសបានជាង ២លាន ៣សែនតោន៕