តុលាការកម្ពុជា ធ្វើការចោទប្រកាន់ ចេញដីកា និងចាប់ខ្លួនអតីតសកម្មជន មេឃុំ ក្រុមប្រឹក្សាឃុំ/សង្កាត់ សមាជិកក្រុមប្រឹក្សាខេត្តរបស់គណបក្សសង្គ្រោះជាតិ ចំនួន៣២នាក់ នៅតាមបណ្ដាខេត្តមួយចំនួន ក្នុងប្រទេសកម្ពុជា ទាក់ទងនឹងការគាំទ្រការធ្វើមាតុភូមិនិវត្តន៍របស់លោក សម រង្ស៊ី បើគិតចាប់ពីថ្ងៃទី២០ តុលា ដល់ថ្ងៃទី០១ វិច្ឆិកា ឆ្នាំ២០១៩នេះ ។
ការចោទប្រកាន់ និងការចាប់ខ្លួនពីសំណាក់អាជ្ញាធរនេះ ធ្វើឡើងក្រោយអ្នកទាំងនោះបានបង្ហាញសកម្មភាពនានាតាមរយៈបណ្ដាញសង្គម Facebook, Group Messenger ជាដើមដោយបំផុសបំផុល កៀរគរ ឃោសនា ឲ្យមហាជនចូលរួមក្នុងដំណើរមាតុភូមិនិវត្តន៍មកកម្ពុជាវិញរបស់លោក សម រង្ស៊ី នៅថ្ងៃទី០៩ ខែវិច្ឆិកា ឆ្នាំ២០១៩ ខាងមុខ ដែលនៅសល់រយៈពេលតែ៨ថ្ងៃទៀតប៉ុណ្ណោះ។
តាមទិន្នន័យដែលអ្នកសារព័ត៌មានវីអូឌី បានកត់ត្រាក្នុងរយៈពេលប្រមាណជាង១០ថ្ងៃចុងក្រោយនេះ (២០តុលា-០១ វិច្ឆិកា) មនុស្ស៩នាក់ត្រូវបានសមត្ថកិច្ចចាប់ខ្លួន ១៩នាក់ត្រូវបានតុលាការចោទប្រកាន់ និង៤នាក់ផ្សេងទៀតត្រូវបានតុលាការចេញដីកាចាប់ខ្លួន ដែលអ្នកទាំងនោះត្រូវបានចោទប្រកាន់ពីបទ «រួមគំនិតក្បត់» ។
មន្ត្រីជាន់ខ្ពស់របស់អតីតគណបក្សសង្គ្រោះជាតិ លោកស្រី មូរ សុខហួរ ថ្លែងប្រាប់អ្នកសារព័ត៌មានតាមបណ្ដាញ WhatsApp ថា ការធ្វើទុកបុកម្នេញរបស់អាជ្ញាធរមកលើអ្នកគាំទ្រអតីតគណបក្សសង្គ្រោះជាតិ គឺជាការរំលោភរដ្ឋធម្មនុញ្ញ រំលោភសិទ្ធិសេរីភាពយ៉ាងធ្ងន់ធ្ងរ។ លោកស្រីបន្ថែមថា ការចោទប្រកាន់របស់តុលាការ គឺជារឿងដែលមិនអាចទទួលយកបាន ហើយថា ទង្វើទាំងនោះវាប៉ះពាល់ដល់ការបាត់បង់ប្រព័ន្ធអនុគ្រោះពន្ធ EBA ដែរ។
លោកស្រីមានប្រសាសន៍ថា៖ «ការចាប់ចង ការគំរាមកំហែង ការយារយី ការតាមដាន ការចោទប្រកាន់ ការឃុំខ្លួន ការឃាត់ខ្លួន និងការបង្ខំឲ្យសមាជិកគណបក្សសង្គ្រោះជាតិ ចេញមុខសារភាព រហូតបង្ខំឲ្យចុះចូលគណបក្សប្រជាជន នេះគឺជាការរំលោភរដ្ឋធម្មនុញ្ញ រំលោភសិទ្ធិសេរីភាពដ៏ធ្ងន់ធ្ងរ។ ការចោទប្រកាន់នេះ យើងមិនអាចទទួលយកបានទេ។ រឿងទាំងនេះក៏ប៉ះពាល់ដល់ការបាត់បង់ EBA ដែរ»។
ឆ្លើយតបទៅនឹងសំណួរថា តើគណបក្សសង្គ្រោះជាតិទទួលខុសត្រូវដូចម្ដេចចំពោះការចាប់ខ្លួនអ្នកគាំទ្រ លោកស្រី មូរ សុខហួរ បញ្ជាក់ថា ខាងគណបក្សមានត្រៀមជាជំនួយផ្សេងៗរួចហើយសម្រាប់អ្នកទាំងនោះ។
លោកស្រីថា៖ «ចំពោះគណបក្សសង្គ្រោះជាតិយើងវិញ ជាបន្ទាន់ ពេលទទួលបានព័ត៌មាន (ចាប់ខ្លួន) យើងមានការបញ្ជូនមេធាវី បញ្ជូនជំនួយតាមផ្លូវចិត្ត ផ្លូវធនធានទាំងឡាយ ជូនទៅដល់ក្រុមគ្រួសារពួកគេ។ យើងមានមេធាវី៤រូប ដែលកំពុងធ្វើការយ៉ាងមមាញឹក»។
អ្នកនាំពាក្យក្រសួងយុត្តិធម៌ លោក ជិន ម៉ាលិន ប្រាប់អ្នកសារព័ត៌មានថា ក្រសួងយុត្តិធម៌មិនទាន់បានធ្វើការបូកសរុបតួលេខជាក់លាក់រឿងចោទប្រកាន់ ឬការចាប់ខ្លួនអតីតមន្រ្តីបក្សប្រឆាំងនៅឡើយទេ។ លោកបញ្ជាក់ថា រឿងតួលេខជាក់លាក់ផ្លូវការ ខាងអគ្គស្នងការនគរបាលជាតិបានបូកសរុបរួចរាល់ហើយ។
លោក ឲ្យដឹងថា៖ «ចំពោះចំនួននេះ ខ្ញុំអត់បានធ្វើការបូកសរុបទេ ប៉ុន្តែខាងអគ្គស្នងការនគរបាលជាតិ គេបានចេញប្រកាសព័ត៌មានពាក់ព័ន្ធនឹងអាហ្នឹងហើយ ទាំងចំនួនអ្នកឃាត់ខ្លួន ទាំងអ្នករងការចោទប្រកាន់ដែលកំពុងរត់គេចខ្លួន អាចយកអាហ្នឹងជាផ្លូវការបាន»។
លោក ឆាយ គឹមខឿន អ្នកនាំពាក្យអគ្គស្នងការនគរបាលជាតិ ប្រាប់អ្នកសារព័ត៌មាននៅថ្ងៃនេះថា គិតត្រឹមថ្ងៃទី០១ ខែវិច្ឆិកា មានមនុស្ស១០៩នាក់ហើយដែលត្រូវបានចោទប្រកាន់ពីបទ «រួមគំនិតក្បត់» និងបទញុះញង់ ក្នុងនោះ៤៨នាក់ត្រូវបានចាប់ខ្លួន និង៦១នាក់ផ្សេងទៀតមានដីកាតាមចាប់ខ្លួន និង២២១នាក់ផ្សេងទៀតបានចេញមុខសារភាព៕
រាយការណ៍ដោយ៖ ម៉ូវ ម៉ារ៉ា
