កម្មករបម្រើការងារក្នុងវិស័យសំណង់ ប្រមាណ៧០ភាគរយ នៅតែបន្តស្នាក់នៅក្នុងអគារ ដែលកំពុងសាងសង់ ទោះបីក្រសួងរៀបចំដែនដី បានចេញសេចក្តីប្រកាស ណែនាំដល់ក្រុមហ៊ុនប្រកបអាជីវកម្មសាងសង់ និងអ្នកម៉ៅការសំណង់ទាំងអស់ ឈប់ឲ្យកម្មករស្នាក់នៅក្នុងអគារដែលកំពុងសាងសង់ក៏ដោយ។
តំណាងសហជីពសំណង់ បានអះអាងថា ក្រុមហ៊ុនសាងសង់ និងអ្នកម៉ៅការសំណង់ ពុំបានអនុវត្តតាមការណែនាំរបស់ក្រសួងដែនដី ដែលតម្រូវឲ្យសង់កន្លែងស្នាក់នៅដាច់ដោយឡែកដល់កម្មករនោះទេ ដោយបន្តអនុញ្ញាតឲ្យពួកគេស្នាក់នៅក្រោមអគារ។
ប្រធានសហព័ន្ធសហជីពកម្មករសំណង់ និងព្រៃឈើកម្ពុជា លោក សុខ គីន បានប្រាប់អ្នកសារព័ត៌មានថា ក្រសួងរៀបចំដែនដី បានចេញសេចក្ដីប្រកាស ដោយហាមកម្មករស្នាក់នៅអគារកំពុងសាងសង់ តាំងពីខែកក្កដាកន្លងទៅ។ប៉ុន្តែរហូតមកដល់ពេលនេះ លោកសង្កេតឃើញថា ក្រុមហ៊ុនភាគច្រើនមិនបានអនុវត្តតាមសេចក្ដីប្រកាសរបស់ក្រសួងនោះទេ។ ក្រុមហ៊ុនទាំងនោះភាគច្រើននៅតែបន្តឲ្យកម្មករសំណង់បន្តស្នាក់នៅក្នុងអគារកំពុងសាងសង់ដដែល។
លោក សុខ គីន មានប្រសាសន៍ថា ៖ «និយាយឲ្យចំ តាំងពីសេចក្ដីជូនដំណឹងរបស់ក្រសួង ចេញមកតាំងពីខែកក្កដា មកដល់ពេលនេះ យើងឃើញថា ក្រុមហ៊ុនប្រមាណ៧០ភាគរយ ដូចអត់ទាន់មានការប្រែប្រួល ឲ្យកម្មករនៅខាងក្រៅអគារនៃការដ្ឋានហ្នឹងសោះ។ ជាទម្លាប់របស់ក្រុមហ៊ុន គាត់ឲ្យនៅកន្លែងណា គឺនៅកន្លែងហ្នឹង។ ខ្ញុំអបអរសាទរដែលមានសេចក្ដីជូនដំណឹង ក៏ប៉ុន្តែខាងក្រុមហ៊ុនដូចអត់មានបានឃើញអនុវត្តសោះ»។
ក្រសួងដែនដី បានចេញសេចក្តីប្រកាសហាមកម្មករស្នាក់នៅក្នុងអគារកំពុងសាងសង់ បន្ទាប់ពីមានករណីបាក់រលំអគារកម្ពស់៧ជាន់ នៅខេត្តព្រះសីហនុ បណ្ដាលឲ្យកម្មករសំណង់ដែលស្នាក់នៅក្នុងអគារចំនួន២៨នាក់បាត់បង់ជីវិត និង២៦នាក់ផ្សេងទៀតរងរបួស កាលពីថ្ងៃទី២២ ខែមិថុនា ឆ្នាំ២០១៩ ។
យោងតាមរបាយការណ៍ក្រសួងរៀបចំដែនដី នគរូបនីយកម្ម និងសំណង់ បានឲ្យដឹងថា នៅក្នុងរយៈពេល៨ខែដំបូងដើមឆ្នាំ ២០១៩ នេះ ទំហំទុនវិនិយោគវិស័យសំណង់ទូទាំងប្រទេសមានតម្លៃសរុបប្រមាណជិត ៦ពាន់លានដុល្លារអាមេរិក ជាមួយនឹងគម្រោងវិនិយោគប្រមាណជាង ៣០០០ គម្រោង។
កម្មករសំណង់បម្រើការងារនៅតាមបណ្ដាការដ្ឋានផ្សេងៗ អះអាងស្រដៀងគ្នាថា ការបន្តស្នាក់នៅក្នុងអគារកំពុងសាងសង់ ដោយសារតែគ្មានជម្រើស ហើយវាអាចជួយសម្រាលបន្ទុកនៃការចំណាយលើថ្លៃស្នាក់នៅ ថ្លៃទឹក និងថ្លៃភ្លើង។ ការស្នាក់នៅក្នុងអគារកំពុងសាងសង់ទាំងនេះបាន ដោយមានការអនុញ្ញាតពីម្ចាស់ក្រុមហ៊ុន ឬអ្នកម៉ៅការសំណង់ ដែលករណីនេះវាផ្ទុយទៅនឹងសេចក្ដីប្រកាសរបស់ក្រសួងរៀបចំដែនដី នគរូបនីយកម្ម និងសំណង់។
កម្មករសំណង់ផ្នែករៀបឥដ្ឋការ៉ូ វ័យ៤០ឆ្នាំ លោក សៀង យីម ធ្វើការនៅការដ្ឋានសំណង់មួយកន្លែង ម្ដុំបឹងបៃតង សង្កាត់ភ្នំពេញថ្មី ខណ្ឌសែនសុខ ប្រាប់អ្នកសារព័ត៌មានថា ពេលសាងសង់ដំបូងៗ ខាងម្ចាស់សំណង់ផ្ដល់តង់សម្រាប់ធ្វើកន្លែងស្នាក់នៅបណ្ដោះអាសន្ន។ ប៉ុន្តែពេលដែលសាងសង់បានខ្លះហើយ ម្ចាស់សំណង់ឲ្យរើទៅស្នាក់នៅខាងក្នុងអគារវិញ។
លោក សៀង យីម មានប្រសាសន៍ថា ៖ «ហ្នឹងហើយ ចាប់ផ្ដើមសង់ គេមានតង់ប្រក់ឲ្យដេកសិន។ ដល់តែសង់បានបន្ទប់ខ្លះហើយ គេឲ្យស្នាក់នៅខាងក្នុងវិញ»។
កម្មករសំណង់រូបនេះបន្ថែមថា លោកពិតជាមានការព្រួយបារម្ភពីសុវត្ថិភាព ព្រោះលោកឃើញសារព័ត៌មានចុះផ្សាយរឿងគ្រោះថ្នាក់ការងារដែលកម្មករសំណង់ជួបប្រទះជារឿយៗ នៅតាមបណ្ដាការដ្ឋានសំណង់ផ្សេងៗ។ ប៉ុន្តែលោកគ្មានលទ្ធភាពក្នុងការជួលកន្លែងស្នាក់នៅខាងក្រៅ។
លោក សៀង យីម បន្ថែមថា៖ «បារម្ភដែរហ្នឹង ឮព័ត៌មានគេចុះផ្សាយរឿងគ្រោះថ្នាក់ដែរ តែឲ្យធ្វើម៉េច…គេឲ្យនៅណា នៅហ្នឹង»។
លោក ឈុន ហេង មេការសំណង់ឯកជនមួយរូប ប្រាប់អ្នកសារព័ត៌មានថា នៅពេលដែលមានការសាងសង់អគារ ខាងលោកមានរៀបចំកន្លែងស្នាក់នៅឲ្យកម្មករនៅក្បែរៗអគារតែម្ដង។ មេការរូបនេះបន្ថែមថា កន្លងមក មិនធ្លាប់មានអាជ្ញាធរចុះណែនាំរឿងសាងសង់នោះទេ ដោយលោកផ្ដល់ហេតុផលថា សំណង់ដែលលោកទទួលសាងសង់ គឺគ្រាន់តែជាលក្ខណៈតូចតាចប៉ុណ្ណោះ។
លោក ឈុន ហេង បញ្ជាក់ថា ៖ «ខ្ញុំម៉ៅការឯកជនធម្មតា។ អឹ ពេលសង់អគារ យើងមានរៀបចំរោង [ស្នាក់នៅ] ក្បែរៗហ្នឹង។ យាយទៅ ខាងខ្ញុំសាងសង់តូចតាចដែរ ដូចជាអត់មាន [អាជ្ញាធរ] ចុះណែនាំអីផង»។
ចំណុចមួយ ក្នុងចំណោមចំណុចជាច្រើន នៃសេចក្តីប្រកាសរបស់ក្រសួងរៀបចំដែនដី ចុះថ្ងៃទី០៤ ខែកក្កដា ឆ្នាំ២០១៩ រៀបរាប់ថា៖ «ក្រុមហ៊ុនប្រកបអាជីវកម្មសាងសង់ និងក្រុមជាងសំណង់ ត្រូវបំពេញកាតព្វកិច្ច និងលក្ខខណ្ឌចម្បងៗ ដូចជា ត្រូវមានការិយាល័យការងារ ឃ្លាំងផ្ទុកសម្ភារៈ ជម្រកកម្មករ គ្រឿងចក្រ សកម្មភាពសាងសង់ ត្រូវរៀបចំ និងប្រព្រឹត្តទៅក្នុងរបងហ៊ុមព័ទ្ធនៃការដ្ឋាន ឬការដ្ឋានរណប ឬទីកន្លែងដែលធានាបានសណ្តាប់ធ្នាប់ និងសន្តិសុខសាធារណៈ ដោយមិនត្រូវឲ្យស្នាក់នៅក្នុងអគារដែលកំពុងសាងសង់ឡើយ»។
កម្មការិនីសំណង់ អ្នកស្រី ឆេង ឡាង មកពីខេត្តកំពង់ធំ សព្វថ្ងៃបម្រើការងារនៅក្នុងការដ្ឋានសំណង់មួយកន្លែង ម្ដុំ វត្តបុទមសេរីសែនមង្គល (ហៅវត្តឃ្មួញ) ក្នុងខណ្ឌសែនសុខ ប្រាប់ឲ្យដឹងថា រាល់ថ្ងៃអ្នកស្រីស្នាក់នៅកន្លែងធ្វើការ គឺក្នុងអគារដែលកំពុងសាងសង់តែម្ដង។
អ្នកស្រីថា ពួកគាត់អាចស្នាក់នៅក្នុងអគារបាន គឺទាល់តែមានការអនុញ្ញាតពីមេការដែលទទួលខុសត្រូវក្នុងការសាងសង់។ ការស្នាក់នៅកន្លែងអគារសាងសង់ អាចជួយកាត់បន្ថយការចំណាយផ្សេងៗ។
អ្នកស្រី ឡាង និយាយថា ៖ «អត់ជួលបន្ទប់ផង នៅកន្លែងសំណង់ហ្មង។ ថ្លៃទឹក ថ្លៃភ្លើង គេអ្នកចេញ យើងគ្រាន់តែធ្វើការឲ្យគេប៉ុណ្ណោះ។ សុវត្ថិភាពអត់អីផង ចា៎! អ៎ ទាល់តែគេអនុញ្ញាតឲ្យនៅ បាននៅបាន»។
លោក សុខ គីន ទទួលស្គាល់ថា មានក្រុមហ៊ុនសាងសង់ខ្លះ ឲ្យកម្មករស្នាក់នៅក្រៅអគារដែលកំពុងសាងសង់ ដោយគេអនុវត្តបែបនេះ តាំងពីមុនមានសេចក្ដីជូនដំណឹងម៉្លេះ ខណៈដែលក្រុមហ៊ុនសាងសង់ផ្សេងទៀតនៅតែបន្តឲ្យកម្មករស្នាក់នៅក្នុងអគារកំពុងសាងសង់ដដែល។
លោក គីន លើកឡើង ៖ «អាចថាមានខ្លះ តាមយើងមើលទៅ ក្រុមហ៊ុនមួយចំនួន គេធ្វើនៅការដ្ឋានផ្សេង កន្លែងស្នាក់នៅផ្សេង មិនអត់ទេ។ តែតាមដែលយើងជួបប្រទះ គាត់ [ក្រុមហ៊ុន] ធ្វើអ៊ីចឹង មុនសេចក្ដីជូនដំណឹងទៀតហ៎។ មានន័យថា ក្រុមហ៊ុនណាធ្លាប់ឲ្យកម្មករស្នាក់នៅក្នុងការដ្ឋាន គឺនៅអ៊ីចឹងដដែល ក្រុមហ៊ុនណាធ្លាប់ឲ្យនៅក្រៅ គឺនៅក្រៅអ៊ីចឹងទៅ”
អ្នកនាំពាក្យក្រសួងរៀបចំដែនដី នគរូបនីយកម្ម និងសំណង់ លោក សេង ឡូត មិនអាចទាក់ទងសុំធ្វើបទសម្ភាស ទាក់ទងនឹងការអនុវត្តតាមសេចក្ដីប្រកាសរបស់ក្រសួង ពីសំណាក់ក្រុមហ៊ុនប្រកបអាជីវកម្មសាងសង់ ឬអ្នកម៉ៅការសាងសង់បានទេ នៅក្នុងសប្ដាហ៍នេះ។
យោងតាមរបាយការណ៍របស់ក្រសួងរៀបចំដែនដី នគរូបនីយកម្ម និងសំណង់ កាលពីថ្ងៃទី១៤ ខែតុលា ឆ្នាំ ២០១៩ បានឱ្យដឹងថា ចំនួនកម្មករសំណង់គិតជាមធ្យមប្រមាណពី ២០០ ០០០ នាក់ ទៅ ២២០ ០០០ នាក់ ក្នុងមួយថ្ងៃ សម្រាប់ទូទាំងប្រទេស។ ដោយឡែកនៅរាជធានីភ្នំពេញ មានកម្មករប្រមាណ ៩០ ០០០ នាក់ ទៅ ១០០ ០០០នាក់ ក្នុងមួយថ្ងៃ គឺមានការថយចុះចំនួន ៣១,៨១ %។
សំណង់នៅទូទាំងប្រទេសមានចំនួនសរុប ៣ ៤៣៣ គម្រោង មានផ្ទៃក្រឡាសំណង់សរុបចំនួន ១៣ ០០០ ៦៥៣ ម៉ែត្រការ៉េ ដែលមានតម្លៃប៉ាន់ស្មានទុនវិនិយោគ ៦ ៤៩៤ ៣៧២ ៣៧១ ដុល្លារ កើនឡើងចំនួន ៣៤,៧៣% ធៀបរយៈពេលដូចគ្នាកាលពីឆ្នាំមុន៕
ដោយ ម៉ូវ ម៉ារ៉ា