កម្មករកម្មការិនីប្រមាណ៥០នាក់ដែលធ្លាប់បម្រើការនៅរោងចក្រ ហ៊ឹង ជីង ស្ថិតក្នុងខណ្ឌមានជ័យ រាជធានីភ្នំពេញបានបាត់ផលប្រយោជន៍ប្រមាណ១០ម៉ឺនដុល្លារ ក្រោយពីថៅកែរោងចក្របិទទ្វាអាជីវកម្មរត់ចោលដោយមិនទូទាត់សំណងជូនពួកគេ។
មន្រ្តីដោះស្រាយវិវាទនៅសម្ព័ន្ធសហជីពស៊ីខៅឌូ លោក ស៊ាង យ៉ូត ដែលចូលប្រជុំស្វែងរកដំណោះស្រាយជាមួយភាគីពាក់ព័ន្ធកាលពីម្សិលមិញមានប្រសាសន៍ថា បើដោះស្រាយតាមផ្លូវច្បាប់ គឺកម្មករប្រមាណ៥០នាក់ត្រូវទទួលបានប្រាក់សំណងជាង១៣ម៉ឺនដុល្លារ។ ទោះយ៉ាងណាក៏ដោយមន្ត្រីសហជីពរូបនេះបន្តថា ក្រោយជួបប្រជុំរកដំណោះស្រាយក្រុមកម្មករសម្រេចព្រមទទួលយកទឹកប្រាក់ត្រឹមតែ៣៧០០០ដុល្លារប៉ុណ្ណោះ ដោយសារពួកគេមិនចង់ខាតពេល និងរង់ចាំយូរបន្តទៀត។
បើតាម លោក ស៊ាង យ៉ូត តំណាងអ្នកទិញសំភារៈក្រុមហ៊ុនហ៊ឹង ជីង និងភាគីក្រសួងការងារបានសន្យាប្រគល់ប្រាក់ចំនួន៣៧០០០ដុល្លារនោះឲ្យកម្មករនៅថ្ងៃទី៣១តុលា។
លោក ស៊ាង យ៉ូត មានប្រសាសន៍ថា ការមិនដោះស្រាយបញ្ហាជូនកម្មករឲ្យបានឆាប់ និងធ្វើកម្មករខាតបង់ផលប្រយោជន៍ដ៏ច្រើននេះ គឺដោយសារភាពកំសោយរបស់ក្រសួងការងារដែលមិនខិតខំយកចិត្តទុកដោះស្រាយជូនកម្មករ។
លោក និយាយថា៖«បញ្ហានេះដោយសារមន្ត្រីរបស់ក្រសួងពុំមានចំណាត់ការច្បាស់លាស់ទៅលើការដោះស្រាយហ្នឹង។ ហើយអាជ្ញាធរអះអាងថា ស្រាវជ្រាវរកថៅកែមិនឃើញ។ ខ្ញុំគិតថាវា គឺភាពកម្សោយរបស់អាជ្ញាធរ និងក្រសួងការងារក្នុងការដោះស្រាយរឿងហ្នឹង»។
កម្មការនីអ្នកស្រី ពៅ លីណា ប្រាប់វី.អូ.ឌីថា ក្រុមកម្មករបានដេកយាមមុខរោងចក្ររយៈពេល៣ខែហើយ ចាប់តាំងពីថៅកែបិទទ្វារឈប់ដំណើរការអាជីវកម្ម ដោយមិនបានដោះស្រាយសំណងជូនពួកគេ។
កម្មការនីរូបនេះបន្តថា មិនតិចជាង៣ដងទេ ដែលអាជ្ញាធរពាក់ព័ន្ធបានជួបប្រជុំគ្នារកដំណោះស្រាយជូនកម្មករ ប៉ុន្តែរហូតមកដល់ពេលនេះនៅតែពុំទទួលបានដំណោះស្រាយដដែល ដែលធ្វើឲ្យកម្មកររងទុក្ខលំបាក ខាត់បង់ពេលវេលា និងពុំមានថវិកាសម្រាប់ចាយវាយប្រចាំថ្ងៃ និងបង់បន្ទប់ជួល ទឹក ភ្លើងជាដើម។
អ្នកស្រីបន្ថែមថា៖«ក្នុងថ្ងៃហ្នឹង[៣១]ខាងអាជ្ញាធរក៏ដោយ ខាងក្រសួង ខាងថៅកែក៏ដោយ ប្រសិនបើថ្ងៃ៣១ហ្នឹងបើអត់បើលុយឲ្យខ្ញុំទេ ពួកខ្ញុំនឹងទាមទារទូទាត់សំណងតាមច្បាប់ស្តីពីការងារវិញហើយ។ ព្រោះខ្ញុំបានសម្រួលអស់ប៉ុណ្ណឹងហើយ ការពិតពួកខ្ញុំត្រូវទទួលបានលុយច្រើនជាងនេះ»។
វី.អូ.ឌី មិនអាចសុំការបកស្រាយពីប្រធានរដ្ឋបាលរោងចក្រហ៊ឹងជីង អ្នកស្រី អួយ ណៃស៊ីម បានទេ ដោយទូរស័ព្ទមិនអាចទាក់ទងបាន។
អនុប្រធាននាយកដ្ឋានវិវាទការងារលោក ខៀវ សាវុធ ដែលទទួលបន្ទុកដោះស្រាយករណីវិវាទការងាររោងចក្រហ៊ឹង ជីង មានប្រសាសន៍ថា ក្រសួងការងារកំពុងខិតខំសម្របសម្រួលដោះស្រាយបញ្ចប់ជូនកម្មករ។
លោក បន្ថែមថា៖« យើងបន្តសម្របសម្រួលគ្នាជាបន្តបន្ទាប់ទៀតរហូតដល់ចប់ ព្រោះយើងមានសិទ្ធិមួយគ្រាន់តែជាអ្នកសម្របសម្រួលប៉ុណ្ណោះ»។
បើតាមកំណត់ហេតុប្រជុំរកដំណោះស្រាយរវាងភាគីពាក់ព័ន្ធកាលពីថ្ងៃទី២១ ខែតុលា ម្ចាស់រោងចក្រ ហ៊ឹង ជីង ឈ្មោះ FAN XIAO LIN ជាជនជាតិចិន និងនាយកគ្រប់គ្រងក្រុមហ៊ុន ឈ្មោះ DAI ZENG JIA ក៏ជាជាតិចិនដែរ ដែលមានកម្មករសរុប ១៥០នាក់បម្រើការងារនៅរោងចក្រមួយនេះ ដោយក្នុងនោះកម្មករចំនួន៥០នាក់ជាសមាជិកសហជីពស៊ីខាវឌូបានបម្រើការងារនៅរោងចក្រ ហ៊ឹង ជីង ចម្លោះពី៣ទៅ៩ឆ្នាំ៕
