អតីតមន្ត្រីគណបក្សសង្គ្រោះជាតិប្រចាំខេត្តស្វាយរៀង លោក គង់ ម៉ាស ត្រូវតុលាការប្រកាសសាលក្រមសម្រេចឱ្យជាប់ពន្ធនាគារចំនួន១ឆ្នាំ ៦ខែ ពីបទប្រមាថ ពីបទញុះញង់ឱ្យប្រព្រឹត្តិអំពើបង្ករឱ្យមានភាពវឹកវរដល់ពលរដ្ឋក្នុងសង្គម។ នេះបើតាមការប្រកាសរបស់ចៅក្រម លោក ពេជ្យ វិទ្យាធរ នារសៀលថ្ងៃ ទី១៨ ខែតុលា។
ក្រោយចូលរួមសវនាការនៅសាលាដំបូងរាជធានីភ្នំពេញ កាលពីថ្ងៃទី០២ ខែតុលា ដើម្បីសួរដេញដោល បញ្ជាក់បន្ថែមលើភស្តុតាងនានា មានសារជាសម្លេង សារជាអក្សរ និងអត្ថបទផ្សេងៗ ដែលមន្ត្រីជាសាក្សីបំភ្លឺមកពីនាយកដ្ឋានផ្ទៃក្នុងនៃក្រសួងមហាផ្ទៃបានប្រមូលចេញពីគណនេយ្យFacebookចំនួន៥ រួចមកនោះ នៅថ្ងៃនេះតុលាការបានប្រកាសសាលក្រមលើសុំណុំរឿងរបស់លោក គង់ ម៉ាស នៅថ្ងៃនេះ។
ចៅក្រម ពេជ្យ វិទ្យាធរ បានអានសាលក្រមថា៖ «តុលាការក្រោមពីបានស្តាប់ចម្លើយអំពីភស្តុតាង ក្រោយពីបានស្តាប់សេចក្តីសន្និដ្ឋានរបស់តំណាងអយ្យការ ក៏បានពិនិត្យ និងពិចារណា សម្រេចសេចក្តីដូចតទៅ មួយទណ្ឌិតឈ្មោះគង់ ម៉ាស ភេទប្រុស កើតនៅថ្ងៃខែឆ្នាំកំណើត ថ្ងៃទី១៤ ខែមិនា ឆ្នាំ១៩៨៨ ជាតិខ្មែរ ដាក់ពន្ធនាគារ១ឆ្នាំ និង៦ខែ ពីបទញុះញង់ឱ្យប្រព្រឹត្តិអំពើបង្ករឱ្យមានភាពវឹកវរដល់ពលរដ្ឋក្នុងសង្គម»។
បើគិតចាប់តាំងពីថ្ងៃចាប់ឃាត់ខ្លួនបញ្ជូនចូលពន្ធនាគារនាថ្ងៃទី១៩ ខែមករា ដើម្បីសូរចម្លើយ ស្វែងរកភស្តុតាងរហូតដល់ថ្ងៃប្រកាសសាលក្រមនេះ លោក ម៉ាស បានជាប់មន្ទីឃុំឃាំងប្រមាណ៩ខែហើយ។
មេធាវីការពារក្តីឱ្យលោក គង់ ម៉ាស់ លោក សំ សុគង់ បានអះអាងថា ការសម្រេចសេចក្តីរបស់តុលាការចំពោះកូនក្តីរបស់លោកនារសៀលនេះ គឺពុំបានផ្តល់យុត្តិធម៌ពេញលេញឱ្យកូនក្តីរបស់លោកឡើយ។ លោកថា កូនក្តីរបស់លោកពុំបានប្រព្រឹត្តិខុសដូចការចោទ ហើយរាល់សកម្មភាពដែលតុលាការបានលើកឡើងធ្វើជាភស្តុតាងនោះ គឺគ្រាន់ជាការប្រើប្រាស់សិទ្ធបញ្ចេញមតិ និងសិទ្ធចូលរួមធ្វើនយោបាយប៉ុណ្ណោះ។
លោក សំ សុខគង់ បានរៀបរាប់ថា៖ «ជាពិសេសគឺ ជាព័ត៌មាន ជាពាក្យពេចន៍នៃការរិះគន់ទៅរដ្ឋាភិបាល និងថ្នាក់ដឹកនាំក្នុងប្រទេសដែលប្រកាន់នូវលទ្ធិប្រជាធិបតេយ្យ។ ដូច្នេះខ្ញុំគិតថា ប្រជាពលរដ្ឋរិះគន់អ្នកដឹកនាំមិនមែនជាកំហុសទេ»។
លោកមេធាវី សំ សុខគង់ បានបញ្ជាក់បន្ថែមថា លោកនឹងទៅពន្ធនាគារជួបលោក គង់ ម៉ាស ដោយផ្ទាល់ ដើម្បីពិភាក្សាផ្នែកផ្លូវច្បាប់ និងសិទ្ធក្នុងការធ្វើបណ្តឹងឧទ្ធរណ៍។ លោកមេធាវីបានបញ្ជាក់បន្ថែមថា ភរិយាលោក គង់ ម៉ាស គឺអ្នកស្រី កុល សាត ក៏បានមកពិភាក្សាជាមួយលោករួចរាល់ហើយ ដើម្បីធ្វើបណ្តឹងសារទុក្ខដាក់ទៅឧទ្ធណ៍បន្តទៅទៀត។
អតីតបេក្ខជនតំណាងរាស្ត្រគណបក្សសង្គ្រោះជាតិប្រចាំខេត្តស្វាយរៀងលោក គង់ ម៉ាស ត្រូវសមត្ថកិច្ចចាប់ឃាត់ខ្លួននៅក្នុងហាងកាហ្វេមួយស្ថិតនៅជិតស្ថានទូតរុស្ស៊ី ក្នុងរាជធានីភ្នំពេញ នាព្រឹកថ្ងៃទី១៦ ខែមករា ឆ្នាំ២០១៩កន្លងទៅ៕