នាយករដ្ឋមន្ត្រីកម្ពុជា លោក ហ៊ុន សែន ក្នុងដំណើរទស្សនកិច្ចទៅកាន់អឺរ៉ុបខាងកើត បានប្រាប់ប្រធានាធិបតីប៊ុលហ្គារីថា ប្រជាធិបតេយ្យនៅកម្ពុជាមិនដើរថយក្រោយនោះទេ។
លោក ហ៊ុន សែន នៅសប្តាហ៍នេះ បានទៅបំពេញទស្សនកិច្ចនៅបណ្តាប្រទេសមួយចំនួននៅអឺរ៉ុបខាងកើត ដូចជាសាធារណរដ្ឋឆែក ហុងគ្រី និងសាធារណរដ្ឋប៊ុលការី ដែលប្រទេសទាំង៣នេះ ជាសមាជិកអឺរ៉ុបផងដែរ។
លោក ហ៊ុន សែន បានបង្ហោះលើហ្វេសប៊ុករបស់លោកថា ក្នុងជំនួបជាមួយប្រធានាធិបតេយ្យប៊ុលហ្គារី គឺលោក រ៉ូមែន រ៉ាដេវ លោកបានស្នើជួយផ្តល់យុត្តិធម៌សម្រាប់កម្ពុជាពីបញ្ហា EBA ហើយថាប្រជាធិបតិបនៅកម្ពុជាមិនបានដើរថយក្រោយទេ ។
លោក ហ៊ុន សែន បញ្ជាក់ថា៖«បច្ចុប្បន្នដំណើរការប្រជាធិបតេយ្យនៅប្រទេសកម្ពុជា មិនមានដំណើរការថយក្រោយនោះទេ។ជាក់ស្តែងការបោះឆ្នោតឆ្នាំ២០១៨កន្លងទៅឆ្នាំនេះបានដំណើរការទៅយ៉ាងល្អបំផុតដោយសារមានគណបក្សចូលរួមច្រើន និងមានអ្នកចេញទៅបោះឆ្នោតរហូតដល់ទៅជាង ៨៣ភាគរយ»។
អតីតអនុប្រធានគណបក្សសង្គ្រោះជាតិលោកស្រី មូរ សុខហួរ ចាត់ទុកការបោះឆ្នោតឆ្នាំ២០១៨ ថាជាផែនការកម្ទេចប្រជាធិបតេយ្យ និងធ្វើឱ្យកម្ពុជាប្រឈមនឹងការកាត់ផ្តាច់ដង្ហើមសេដ្ឋកិច្ចពីសហគមន៍អន្តរជាតិ ។
លោកស្រីថា៖«ការបោះឆ្នោតជាតិឆ្នាំ២០១៨ជាសេណារីយូរបស់លោក ហ៊ុន សែន នៅក្នុងសេណារីយូនោះគឺច្បាស់ណាស់គឺកម្ទេច រំលាយគណបក្សសង្គ្រោះជាតិ ដោយចាប់ផ្តើមពីការចាប់លោកប្រធាន កឹម សុខា ដែលឃុំឃាំងរហូតដល់ពេលនេះ ។ទាំងអស់នេះ ជាការបោះឆ្នោតដោយក្លែងក្លាយមិនសេរី មិនយុត្តិធម៌ ដែលសហគមន៍អឺរ៉ុប សហរដ្ឋអាមេរិក គេថ្កោលទោស គេមិនទទួលស្គាល់ការបោះឆ្នោតនេះទេ »។
មន្ត្រីឃ្លាំមើលការបោះឆ្នោតនៅអង្គការខុមហ្វ្រែលលោក កន សាវាង្ស ពន្យល់ថា ការបោះឆ្នោតតាមគោលការណ៍ប្រជាធិបតេយ្យក្រៅពីមានគណបក្សចូលរួមប្រកួតច្រើន គេត្រូវធ្វើការប្រកួតនោះមានតម្លាភាព គ្មានការគំរាមកំហែងផ្នែកនយោបាយ។
លោកថា៖«យើងឃើញថា ការបោះឆ្នោតឆ្នាំ២០១៨រឿងសំខាន់មួយគឺការបដិសេធគណបក្សនយោបាយ[សង្គ្រោះជាតិ]ដែលជាគូប្រកួតប្រជែងដ៏សំខាន់មួយ ដែលយើងឃើញកន្លងមកគណបក្សដែលត្រូវបានបដិសេធហ្នឹងគឺជាគណបក្សដែលមានអ្នកគាំទ្រប្រហាក់ប្រហែលបក្សកាន់អំណាចបច្ចុប្បន្ន។អ៊ីចឹងយើងឃើញថាការមិនបានចូលរួមការបោះឆ្នោតនេះ គឺជាចំនុចមួយសំខាន់ណាស់ក្នុងដំណើរការលទ្ធិប្រជាធិបតេយ្យ»។
អតីតគណបក្សសង្គ្រោះជាតិត្រូវតុលាការកំពូលចេញសាលដីការំលាយ៨ខែ មុនការបោះឆ្នោតជាតិឆ្នាំ២០១៨មកដល់ ។
សហភាពអឺរ៉ុប បានជូនដំណឹងដល់កម្ពុជាកាលពីខែកុម្ភៈដើមឆ្នាំនេះ ពីវិធានការព្យួរប្រព័ន្ធអនុគ្រោះពន្ធអ្វីៗគ្រប់យ៉ាងលើកលែងតែអាវុធ ហៅកាត់ថា EBA ជាបណ្ដោះអាសន្នក្រោយខ្លួនរកឃើញថា រដ្ឋាភិបាលកម្ពុជា មិនបានធ្វើឲ្យប្រសើរពីស្ថានភាពសិទ្ធិមនុស្ស និងប្រជាធិបតេយ្យតាមលក្ខខណ្ឌរបស់ខ្លួន។
សមាគមរោងចក្រកាត់ដេរកម្ពុជាGMACបង្ហាញក្ដីបារម្ភថា កម្មករក្នុងវិស័យកាត់ដេរ៧៥ម៉ឺននាក់នឹងរងផលប៉ះពាល់ រីឯពលរដ្ឋខ្មែរ៣លានគ្រួសារផ្សេងទៀត នឹងប៉ះពាល់ដោយប្រយោល បើកម្ពុជាមិនអាចការពារប្រព័ន្ធអនុគ្រោះពន្ធរបស់សហភាពអឺរ៉ុបបាន។
ទោះជាយ៉ាងណា លោក ហ៊ុន សែន អះអាងថា ដំណើរទស្សនកិច្ចរបស់លោក ទៅកាន់អឺរ៉ុបខាងកើតនេះ មានការគាំទ្រពីសាធារណរដ្ឋឆែក ហុងគ្រី និងប៊ុលហ្គារី គាំទ្រសំណើរកម្ពុជាពីបញ្ហាEBA ដើម្បីជំរុញទៅសភាពអឺរ៉ុប ឲ្យផ្តល់យុត្តិធម៌ដល់កម្ពុជា ពីដំណើរការប្រជាធិបតេយ្យនៅកម្ពុជានេះ៕
