សមត្ថកិច្ចខេត្តកំពត និងខេត្តព្រះសីហនុ បានសហការគ្នាចាប់ខ្លួនបុរស៣នាក់ដែលសង្ស័យបានរំលោភបូកលើ នារីទេសចរជនជាតិបារាំងម្នាក់នៅខេត្តកំពតបានហើយនៅថ្ងៃនេះ។
ស្នងការនគរបាលខេត្តកំពតលោក ម៉ៅ ច័ន្ទមធុរិទ្ធ បានប្រាប់ប្រាប់វីអូឌីនៅរសៀលនេះថាបុរស៣នាក់ដែលសង្ស័យបានរំលោភបូកលើស្ត្រីជនបារាំងនៅខេត្តកំពតកាលពីថ្ងៃទី១១ ខែតុលានោះត្រូវបានសមត្ថស្រាវជ្រាវចាប់ខ្លួនបានទាំងអស់ហើយនៅថ្ងៃនេះ។
ស្នងការរូបនេះឲ្យដឹងថា ក្រោយទទួលបានពាក្យបណ្តឹងពីជនរងគ្រោះកម្លាំងនគរបាលជំនាញសហការគ្នាស្រាវជ្រាវចាប់បានជនសង្ស័យម្នាក់ឈ្មោះ សេង ស្រ៊ុន អាយុ៣៧ឆ្នាំ មានទីលំនៅភូមិបឹងវែង ឃុំ វាលរិញ ស្រុកព្រៃនប់ ខេត្តព្រះសីហនុ ដែលមុខរបរបើកឡានឈ្នួល។
លោកស្នងការបន្តថា ក្រោយជនសង្ស័យទី១សារភាព គឺសមត្ថកិច្ចបានស្រាវជ្រាវចាប់ជនសង្ស័យពីរនាក់នៅរសៀលនេះ ក្រោយបុរស២នាក់នោះរត់គេចខ្លួន។ តាមទំព័រហ្វេសប៊ុករបស់ស្នងការដ្ឋាននគរបាលខេត្តកំពត ជនសង្ស័យ២នាក់ទៀតមានឈ្មោះ ពុំ លីវី អាយុ ១៩ឆ្នាំ មកពីស្រុកបរសេដ ខេត្តកំពង់ស្ពឺ និង
ឈ្មោះ ង៉ែត នភា អាយុ ២៣ឆ្នាំ មកពីស្រុកឈូក ខេត្តកំពត។ ពួកគេទាំង២នាក់ជាកម្មករតទឹកនៅលើភ្នំបូកគោ។
កាលពីរំលងអធ្រាតយប់ថ្ងៃទី១១ ខែតុលា ឆ្នាំ២០១៩ ស្ដ្រីជនជាតិបារាំងម្នាក់ត្រូវបានជនមួយក្រុមមានគ្នា៣នាក់ចាប់បង្ខំរុញនាងចូលរថយន្តយកទៅចាប់រំលោភបូកបានសម្រេចទាំងអស់គ្នានៅម្តុំឆ្នេរមាត់ព្រែកកំពត ខេត្តកំពត៕