នាយករដ្ឋមន្ត្រីកម្ពុជា លោក ហ៊ុន សែន ក្នុងដំណើរទស្សនកិច្ចទៅកាន់អឺរ៉ុបខាងកើតនាសប្តាហ៍នេះ បានស្នើប្រទេសហុងគ្រី ជាសម្ព័ន្ធមិត្តចាស់ឲ្យបន្តគាំទ្រកម្ពុជាជុំវិញបញ្ហាEBA ។
លោក ហ៊ុន សែន នៅសប្តាហ៍នេះ ប្រើពេល៥ថ្ងៃ សម្រាប់ដំណើរទស្សនកិច្ចរបស់លោក ទៅជួបមេដឹកនាំសាធារណរដ្ឋឆែក ហុងគ្រី និងសាធារណរដ្ឋប៊ុលការី ។
តាមហ្វេសប៊ុកនាយករដ្ឋមន្ត្រីហ៊ុន សែន កាលពីថ្ងៃអង្គារម្សិលមិញ មេដឹកកម្ពុជាបានស្នើប្រធានាធិបតីហុងគ្រី លោក ជេណូស អាឌឺ (Janos ADER) ឲ្យបន្តគាំទ្រកម្ពុជាពីបញ្ហាEBA ។
បើតាមនាយករដ្ឋមន្ត្រី«អ្វីដែលកម្ពុជាចង់បាននោះ គឺចង់ឲ្យសហភាពអឺរ៉ុបមានដំណើរការ និងប្រព្រឹត្តទៅដោយយុត្តិធម៌សម្រាប់ប្រទេសកម្ពុជា»។ប្រភពដដែល បញ្ជាក់ថាសំណើរនេះ ត្រូវបានប្រធានាធិបតីហុងគ្រីគាំទ្រ ។
VOD មិនអាចសុំការបញ្ជាក់ពីស្ថានទូតហុងគ្រី តាមសារអេឡិចត្រូនិចបាននៅឡើយទេគិតត្រឹមម៉ោងផ្សាយនេះ ដោយពុំទាន់មានអ្នកឆ្លើយតប។
អតីតតំណាងរាស្ត្រគណបក្សសង្គ្រោះជាតិ លោក អ៊ូ ច័ន្ទរ័ត្ន មានប្រសាសន៍ថា ការចង់បានយុត្តិធម៌ពីសហភាពអឺរ៉ុបពាក់ព័ន្ធនឹងបញ្ហាEBA ត្រូវផ្តើមចេញពីការផ្តល់យុត្តិធម៌ឲ្យគណបក្សសង្គ្រោះជាតិដែលបានផាត់ចេញពីឆាកនយោបាយ។
លោក មានប្រសាសន៍ថា៖«ខ្ញុំយល់ថា អាចរដ្ឋាភិបាលយល់ថាមិនយុត្តិធម៌សម្រាប់គាត់ ប៉ុន្តែអ្វីដែលសហភាពអឺរ៉ុបគេទាមទារ ខ្ញុំយល់ថាជាយុត្តិធម៌សម្រាប់ពលរដ្ឋខ្មែរ ព្រោះការរំលោភបំពាននិងបំបាត់សំឡេងប្រឆាំងដែលមានអ្នកគាំទ្រប្រហាក់ប្រហែលគ្នា។ យើងយល់ថា អាហ្នឹងជារឿងយុត្តិធម៌សម្រាប់ខ្លួនឯង តែសម្រាប់ម្ខាងទៀត[អតីតបក្សប្រឆាំង]គេយល់ថាអាហ្នឹងមិនយុត្តិធម៌សម្រាប់គេ»។
សហភាពអឺរ៉ុប បានជូនដំណឹងដល់កម្ពុជាកាលពីខែកុម្ភៈដើមឆ្នាំនេះ ពីវិធានការដកEBA ក្រោយខ្លួនរកឃើញថា រដ្ឋាភិបាលកម្ពុជា មិនបានធ្វើឲ្យប្រសើរពីស្ថានភាពសិទ្ធិមនុស្ស និងប្រជាធិបតេយ្យតាមលក្ខខណ្ឌរបស់ខ្លួន។
លក្ខខណ្ឌនោះ សហភាពអឺរ៉ុប ធ្លាប់ទាមទារឲ្យដោះលែង លោក កឹម សុខា ត្រូវធានាឲ្យមានការបោះឆ្នោតឡើងវិញមានលក្ខណៈសេរី និងយុត្តិធម៌ តាមយន្តការប្រជាធិបតេយ្យ មានអតីតគណបក្សប្រឆាំងចូលរួមប្រកួតឡើងវិញ។
វិធានការនេះ សហភាពអឺរ៉ុបនឹងប្រកាសជាផ្លូវការនៅចុងឆ្នាំនេះ ហើយសុពលភាពនៃការអនុវត្តវិធានការ នឹងចាប់ផ្តើមអនុវត្តចាប់ពីពាក់កណ្តាលខែកុម្ភៈដើមឆ្នាំ២០២០ទៅ ។
សមាគមរោងចក្រកាត់ដេរកម្ពុជា GMAC បានបង្ហាញក្ដីបារម្ភថា បើកម្ពុជាមិនអាចរក្សាទុកប្រព័ន្ធអនុគ្រោះពន្ធEBA របស់សហភាពអឺរ៉ុបនេះបានទេ នឹងប៉ះពាល់ដល់កម្មកររោងចក្រ៧៥ម៉ឺននាក់ និងពលរដ្ឋខ្មែរ៣លានគ្រួសារផ្សេងទៀតដោយប្រយោល។
អ្នកវិភាគនយោបាយលោក ឯម សុវណ្ណរ៉ា ហៅដំណើរទស្សនកិច្ចស្វែងការគាំទ្រពីប្រទេសមួយចំនួននៅអឺរ៉ុបខាងកើតនេះ មិនអាចទប់ស្កាត់វិធានការប្លុកលោកសេរីមួយនេះបានទេ ។
ប៉ុន្តែអ្នកវិភាគរូបនេះ ផ្តល់ជាយោបល់ថា បើរដ្ឋាភិបាលកម្ពុជា ចង់រក្សាទុកប្រព័ន្ធអនុគ្រោះពន្ធEBAរបស់សហភាពអឺរ៉ុបពិតប្រាកដមែនត្រូវស្វែងរកដំណោះស្រាយនយោបាយធានាដំណើរការប្រជាធិបតេយ្យឡើងវិញតាមលក្ខខណ្ឌរបស់សហភាពអឺរ៉ុប ។
លោក និយាយថា៖«កម្ពុជាត្រូវតែមានយន្តការឆ្លើយតបទៅនឹងអ្វីដែលឆ្លើយតបទៅនឹងលទ្ធិប្រជាធិបតេយ្យនិងសិទ្ធិមនុស្សហ្នឹង ឱ្យតាមសំណូមពររបស់សហភាពអឺរ៉ុបលើកឡើង បើមិនដូច្នោះទេកម្ពុជាយើងអាចបាត់បង់EBAនេះហើយ»។
ទោះជាយ៉ាងណានាយករដ្ឋមន្ត្រីកម្ពុជាធ្លាប់អះអាងថា កម្ពុជានឹងមិនយកអធិបតេយ្យរបស់ខ្លួនទៅដោះដូរនឹងលក្ខខណ្ឌជំនួយណាមួយពីអន្តរជាតិនោះទេ ហើយថាការបាត់បង់ប្រព័ន្ធអនុគ្រោះពន្ធEBAនឹងមិនធ្វើឲ្យកម្ពុជាស្លាប់ដែរ ហើយបើប្រព័ន្ធនេះនៅរក្សាទុក ក៏មិនធ្វើឲ្យកម្ពុជាក្លាយជាអ្នកមានដែរ៕
