ប្រមុខរដ្ឋាភិបាលកម្ពុជា គ្រោងទិញយន្តហោះស៊ើបការណ៍ប្រភេទថ្មីL39 និងអាវុធមួយចំនួនបន្ថែមទៀតពីប្រទេសឆែក ដោយថាដើម្បីការពារជាតិ ខណៈកម្ពុជាធ្លាប់បានទិញយន្តហោះប្រភេទនេះចំនួន៦គ្រឿងរួចម្តងមកហើយនាពេលកន្លងមក។
ថ្លែងក្នុងសន្និសីទសារព័ត៌មានរួមគ្នាជាមួយប្រមុខរដ្ឋាភិបាលឆែក នៅទីក្រុងប្រាកកាលពីថ្ងៃទី១៤ខែតុលា លោកនាយករដ្ឋមន្ត្រី ហ៊ុន សែន បានបង្ហាញការពេញចិត្តចំពោះយន្តហោះស៊ើបការណ៍ប្រភេទថ្មីរបស់ឆែក ហើយលោកបានស្នើឲ្យមានការពិភាក្សារអំពីលទ្ធភាពដែលកម្ពជាយន្តហោះប្រភេទនេះ និងអាវុធមួយចំនួនទៀត ដែលលោកថាដើម្បីរក្សាសន្តិសុខ និងការពារជាតិ។ ប៉ុន្តែលោកមិនបានបញ្ជាក់ថា ទិញពេលណានោះទេ។
លោក បន្ថែមថា៖«នៅព្រឹកមិញនេះ ខ្ញុំក៏បានស្នើសុំពិភាក្សាអំពីលទ្ធភាព ដែលកម្ពុជាអាចទិញយន្តហោះស៊ើបការណ៍ L39ប្រភេទថ្មី៣ទៅ៤គ្រឿងបន្ថែមទៀត។ ហើយយើងនឹងពិភាក្សាអំពីបញ្ហានេះ រួមទាំងអាវុធមួយចំនួនទៀតដែលកម្ពុជាកំពុងនាំចូល និងអាចបន្ថែមអាវុធធនស្រាលមួយចំនួនផ្សេងទៀតនៅក្នុងវិស្ស័យទំនាក់ទំនងសន្តិសុខ និងការពារជាតិរបស់យើង»។
អ្នកនាំពាក្យក្រសួងការពារលោក ឈុំ សុជាតិ មានប្រសាសន៍ថា ការទិញយន្តហោះស៊ើបការណ៍និងអាវុធចូលបន្ថែមនេះគឺដើម្បីអភិវឌ្ឍន៍វិស័យការពារជាតិ ដោយថាបច្ចុប្បន្នកម្ពុជាកំពុងខ្វះមធ្យោបាយក្នុងការស៊ើបការណ៍តាមយន្តហោះ។ អ្នកនាំពាក្យរូបនេះបញ្ជាក់ថា ការទិញយន្តហោះ និងអាវុធបន្ថែមនេះមិនមែនដើម្បីគំរាមកំហែងទៅលើក្រុមណា និងប្រទេសណាមួយឡើយ។
លោកបន្ថែមថា៖«ការទិញនេះ គឺដើម្បីពង្រឹងការរីកចំរើន និងការកែទម្រង់កងយោធពលខេមរភូមិន្ទយើងឲ្យរឹងមាំ ដើម្បីធានាបាននូវការការពារបូរណភាពទឹកដី និងមាតុភូមិរបស់យើង។ ហើយនេះជាតម្រូវការការពារជាតិមិនមែនជាការគំរាមកំហែងប្រទេសណាមួយនោះទេ»។
អ្នកវិភាគនយោបាយ លោកបណ្ឌិត ឡៅ ម៉ុងហៃ បានសារទរចំពោះរដ្ឋាភិបាលដែលទិញយន្តហោះ និងអាវុធទំនើបថ្មីៗឲ្យកងទ័ពប្រើប្រាស់ដើម្បីការពារជាតិ ប៉ុន្តែលោកក៏ស្នើទៅរដ្ឋាភិបាលត្រូវមានយុទ្ធសាស្រ្តថ្មីៗបន្ថែមទៀតផងដែរ ដើម្បីការពារបូរណភាពទឹកដី។
លោក មានប្រសាសន៍ថា៖« ប៉ុន្តែគ្រាន់តែអញ្ចេះទេ ថាតើយើងមានគំនិតឬយុទ្ធសាស្ត្រការពារទឹកដីហ្នឹង បើយើងគិតតែយកកងទ័ពទៅការពារក៏មិនកើតដែរ។ មកទល់សព្វថ្ងៃនេះ កងទ័ពការពារបានអីខ្លះហើយ ព្រំដែនកាន់តែរួញ ព្រំដែនដីគោកហ្នឹងឥលូវនេះសឹងថា មិនច្បាស់លាស់ផង។ អីចឹងហើយបានជាថា យើងត្រូវរកយុទ្ធសាស្ត្រថ្មីកុំពឹងផ្អែកទៅកងទ័ព និងអាវុធខ្លាំងពេក»។
អ្នកនាំពាក្យសមាគមអាដហុកលោក ស៊ឹង សែនករុណា មានប្រសាសន៍ថា ប្រទេសលើពិភពលោកមួយចំនួនដែលកំពុងជួបអសន្តិសុខ និងវិបត្តិសង្គ្រោម គឺពួកគេចាំបាច់ត្រូវតែទិញសព្វាវុធមកប្រើប្រាស់ដើម្បីការពារ ។ ប៉ុន្តែសម្រាប់ស្ថានភាពប្រទេសកម្ពុជាបច្ចុប្បលោកមើលឃើញថា រដ្ឋាភិបាលមិនគួរសម្រុកទិញសព្វាវុធទាំងនោះច្រើនពេកទេ ខណៈកម្ពុជាកំពុងជាប់បំណុលច្រើន ហើយប្រជាពលរដ្ឋក៏ជួបបញ្ហាជីវភាពដែរនោះ។
លោកបន្ថែមថា៖«វាជារឿងល្អប្រសើរប្រសិនបើប្រទេសហ្នឹងជាប្រទេសស្ថិតនៅក្នុងស្ថានភាពប្រឈមនឹងសង្គ្រាមជាមួយបរទេសហ្នឹងយើងគួរតែប្រើប្រាស់យន្តហោះដើម្បីស៊ើបការណ៍ដឹងពីស្ថានភាពរបស់សត្រូវជាដើមហ្នឹង។ ប៉ុន្តែខ្ញុំមើលឃើញថា ការប្រើប្រាស់យន្តហោះស៊ើបការណ៍ក្នុងស្ថានភាពប្រទេសកំពុងជួបវិបត្តិក្រីក្រ និងជាប់បំណុលគេច្រើន ហើយបញ្ហាប្រជាពលរដ្ឋអត់ការងារធ្វើច្រើន អីចឹងវាមិនមែនជាស្ថានភាពមួយល្អទេ។ អីចឹងវានឹងមានការរិះគន់ពីខាងប្រជាពលរដ្ឋ។ អីចឹងមុនសម្រេចធ្វើអីមួយរដ្ឋាភិបាលត្រូវគិតពីជីវភាពប្រជាពលរដ្ឋ»។
ក្នុងពិធីពិនិត្យការដ្ឋានសំណង់ពហុកីឡដ្ឋានជាតិមរតកតេជោ ស្ថិតនៅក្នុងខណ្ឌជ្រោយចង្វា កាលពីថ្ងៃទី២៩ កក្តដា ឆ្នាំ២០១៩នេះ លោកនាយករដ្ឋមន្រ្តី ហ៊ុន សែន ប្រកាសថា កម្ពុជាបង្កើនកញ្ចប់ថវិកា៤០លានដុល្លារបន្ថែមទៀតទៅដល់ក្រសួងការពារជាតិសម្រាប់បញ្ជាទិញសព្វាវុធពីប្រទេសចិន ដែលលោកថាដើម្បីបំពាក់ដល់កងទ័ពដែលប្រើប្រាស់អាវុធចាស់ៗ៕
រាយការណ៍បន្ថែមដោយ៖ម៉ូវ ម៉ារ៉ា