លោក ជិន សុខង៉េង ដែលបានជាប់ឆ្នោតជាចៅសង្កាត់វ័យក្មេងជាងគេកាលពីអំឡុងពេលបោះឆ្នោតឃុំសង្កាត់ឆ្នាំ២០១៧ ត្រូវបានតុលាការខេត្តសៀមរាបចេញដីកាបង្គាប់ឱ្យសមត្ថកិច្ចចាប់ខ្លួនក្នុងបទចោទរួមគំនិតក្បត់។
សេចក្ដីប្រកាសព័ត៌មានរបស់អយ្យការអមសាលាដំបូងខេត្តសៀមរាប ចុះកាលបរិច្ឆេទនៅថ្ងៃទី១៤តុលា បញ្ជាក់ថា តុលាការសម្រេចចោទលោកជិន សុង៉េង វ័យ២៨ឆ្នាំ ពីបទរួមគំនិតក្បត់តាមមាត្រា៤៥៣នៃក្រមព្រហ្មទ័ណ្ឌ។
ស្ថាប័ននេះបញ្ជាក់ទៀតថា ការចោទប្រកាន់គឺធ្វើឡើងបន្ទាប់ពីលោកសុខង៉េង ជាអតីតប្រធានយុវជនគណបក្សសង្គ្រោះជាតិកាលពីថ្ងៃទី១៦សីហាឆ្នាំ២០១៩បានទៅចូលរួមជាមួយយុវជនផ្សេងទៀតទៅជួបលោកសមរង្ស៊ី នៅប្រទេសម៉ាឡេស៊ីដើម្បីទទួលផែនការផ្តួលរំលំនិងប្រឆាំងរាជរដ្ឋាភិបាល។
អ្នកនាំពាក្យអយ្យការអមសាលាដំបូងខេត្តសៀមរាបបញ្ជាក់ថា៖ «អ្នកពាក់ព័ន្ធនិងការគាំទ្រឬចូលរួមអនុវត្តផែនការប៉ុនប៉ងផ្តួលរំលំរដ្ឋាភិបាលនឹងចោទប្រកាន់ពីបទរួមគំនិតក្បត់ ដែលអាចជាប់ពន្ធនាគារពី០៥ឆ្នាំទៅ១០ឆ្នាំ លើកលែងតែអ្នកចូលមកសារភាពទាន់ពេលវេលាដែលអាចនឹងត្រូវលើកលែងទោស»។
លោក ជិន សុខង៉េង បានជាប់ជាចៅសង្កាត់សាលាកំរើក ក្រុងសៀមរាប ខេត្តសៀមរាប ក្នុងការបោះឆ្នោតឃុំសង្កាត់ឆ្នាំ២០១៧ កន្លងទៅ ។ អាសនៈក្រុមប្រឹក្សាឃុំ-សង្កាត់របស់គណបក្សសង្គ្រោះជាតិ ចំនួន ៥០០៧អាសនៈ ដែលបានមកពីការបោះឆ្នោតឃុំ-សង្កាត់ ត្រូវបាត់បង់ទាំងស្រុង គណបក្សត្រូវរំលាយកាលពីខែវិច្ឆិកា ឆ្នាំ២០១៧។ តំណែងលោកសុខង៉េង កាន់ការងារជាចៅសង្កាត់សាលាកំរើក បានតែជាង ៣ ខែ ក៏ត្រូវបាត់បង់តំណែងវិញ តាមនោះដែរ។
លោកធ្លាប់ល្បីឈ្មោះក្នុងបណ្ដាញសារព័ត៌មាននានា ទន្ទឹមគ្នានឹងចៅសង្កាត់វ័យក្មេងរបស់បក្សប្រឆាំងនៅខេត្តបាត់ដំបងកញ្ញា ស៊ិន ចាន់ពៅរ៉ូហ្សិតដែរ។ យុវជនសុខង៉េង ក៏សព្វថ្ងៃជាអ្នកប្រកបរបរលក់ដូរធម្មតា និងជានិស្សិតផ្នែកវេជ្ជសាស្ដ្រផង។ លោកធ្លាប់បញ្ជាក់ថាអ្នកកាសែតថា ៖« លោកមិនអាចចូលរួមសកម្មភាពនយោបាយជាមួយគណបក្សកាន់អំណាចឡើយ»។
ទោះជាយ៉ាងណាក្ដីប្រភពពីតុលាការខេត្តសៀមរាបបញ្ជាក់ថា អាជ្ញាធរមិនទាន់ចាប់ខ្លួនលោកជិន សុង៉េង បាននៅឡើយទេ។
តុលាការតាមសាលាដំបូងនៅខេត្តនានា បានចេញដីកាចាប់ខ្លួនអតីតសកម្មជនគណបក្សសង្គ្រោះជាតិជាបន្តបន្ទាប់ រាប់សិបករណីគិតត្រឹមថ្ងៃទី១៥តុលានេះ៕