ស្នងការនគរបាលខេត្តកំពត បានឲ្យដឹងថា សមត្ថកិច្ចកំពុងស្រាវជ្រាវរកមុខសញ្ញាជនមួយក្រុមដែលបានរំលោភបូកលើស្រ្តីភ្ញៀវទេសចរណ៍ជនជាតិបារាំងម្នាក់កាលចុងសប្តាហ៍មុន។
ស្នងការនគរបាលខេត្តកំពតលោក ម៉ៅ ច័ន្ទមធុរិទ្ឋ បានឲ្យដឹងថា កាលពីថ្ងៃ១១ ខែតុលា មានស្ត្រីជនជាតិបារាំងម្នាក់ បានដាក់ពាក្យបណ្តឹងទៅ ស្នងការដ្ឋាននគរបាលខេត្តកំពត ដោយអះអាងថា មានជនទាំង៣នាក់ បានចាប់បង្ខំនាងឲ្យចូលរថយន្តហើយយកទៅរំលោភបូកនៅកន្លែងស្ងាត់មួយនៅក្នុងមូលដ្ឋានខេត្តកំពត។
ស្នងការនគរបាលរូបនេះ បន្តថា ក្រោយទទួលបានបណ្តឹងនេះសមត្ថកិច្ច និងអាជ្ញាធរពាក់ព័ន្ធ បានស្រាវជ្រាវស្វែងរកការចាប់ខ្លួនជនសង្ស័យទាំង៣នាក់នោះ ដើម្បីមកផ្តន្ទាទោសតាមផ្លូវច្បាប់។
ប៉ុន្តែលោក ម៉ៅ ច័ន្ទមធុរិទ្ឋ បន្ថែមថា ករណីបណ្តឹងនេះ គឺសមត្ថកិច្ចពិបាកក្នុងការស្វែងរកចាប់ខ្លួនជនសង្ស័យបន្តិច ដោយសាររងគ្រោះផ្តល់ព័ត៌មានមិនសូវច្បាស់លាស់ និងមិនបានបន្សល់ទុកស្នាកស្នាមគ្រប់គ្រាន់ក្នុងការស្វែងរកតម្រុយ។ ទោះយ៉ាងណាក៏ដោយ លោកថា អាជ្ញាធរពាក់ព័ន្ធនឹងខិតខំធ្វើការលើរឿងនេះ ដើម្បីស្វែងរកចាប់ល្មើសមកដាក់ទោសឲ្យខានតែបាន៕
រាយការណ៍បន្ថែម៖ម៉ិច ជូឡាយ
