មន្ត្រីជាន់ខ្ពស់ក្រសួងបរិស្ថាន បានឱ្យដឹងថា ក្រសួងបានកសាងនូវរូបសំណាកដំរីមួយ ដែលត្រូវបានធ្វើឡើងពីវត្ថុតាងនៃបទល្មើសព្រៃឈើនោះ ដើម្បីជំរុញការអភិរក្សធនធានធម្មជាតិ។
អ្នកនាំពាក្យក្រសួងបរិស្ថាន លោក នេត្រ ភក្ត្រា បានឱ្យដឹងនៅថ្ងៃនេះថា រូបសំណាកដំរីមួយនេះ ត្រូវបានផ្គុំចេញពីបំណែកនៃរណាយន្តចំនួន ៣០០គ្រឿង ហើយត្រូវចំណាយថវិកាចំនួន ១៧,៥០០ដុល្លារសម្រាប់ការដំឡើងរូបសំណាកមួយនេះ។
លោក នេត្រ ភក្ត្រា ប្រាប់ថា៖ «ជាងនេះទៅទៀត ក៏ចង់បង្ហាញប្រាប់ថា រណាយន្ត គឺជាមធ្យោបាយប្រព្រឹត្តិបទល្មើសកាប់រុករានដីព្រៃរបស់រដ្ឋ និងក្នុងន័យបញ្ឈប់នូវការប្រើប្រាស់រណាយន្ត ដែលនាំឱ្យមានការបំផ្លិញបំផ្លាញធនធានធម្មជាតិ ហើយងាកមកចាប់អារម្មណ៍សត្វដំរីដែក ១ក្បាលដែលធ្វើពីវត្ថុតាងរណាយន្ត និងចង់ពញ្ញាក់ស្មារតីរបស់ប្រជាពលរដ្ឋឱ្យចូលរួមសកម្មភាពការពារ និងអភិរក្សហ្វូងសត្វដំរីរស់ក្នុងគោលដៅបង្កើនប្រាក់ចំណូលពីវិស័យទេសចរណ៍នៅក្នុងខេត្តមណ្ឌលគិរី»។
បើតាមអ្នកនាំពាក្យរូបនេះ រូបសំណាកដំរីមួយក្បាលនេះ នឹងត្រូវនាំយកទៅដាក់តាំងបង្ហាញជាសាធារណៈនៅក្នុងឧទ្យានសែនមនោរម្យ ស្ថិតក្នុងខេត្តមណ្ឌលគិរីនាពេលឆាប់ៗខាងមុខនេះ។
អត្ថបទដែលផ្ដល់ឱ្យដោយលោក នេត្រ ភក្ត្រា បង្ហាញថា រូបសំណាកដំរីមានកម្ពស់ ២.៨០ម៉ែត្រ បណ្ដោយប្រវែង ៣.១០ម៉ែត្រ និងទំហំខ្លួនចន្លោះពី ០.៩០ ទៅទំហំ ១ម៉ែត្រ។
ក្រសួងបរិស្ថាន បានកសាងរូបសំណាកដំរីមួយរួចមកហើយ ដែលតំណាងឱ្យកូនដំរីឈ្មោះ «ឈូក» ដែលបានដាច់ជើងម្ខាងក្រោយពីជាន់អន្ទាក់ព្រានព្រៃនៅក្នុងដែនជម្រកសត្វព្រៃស្រែពក កាលពីឆ្នាំ២០០៧កន្លងមក។
សព្វថ្ងៃនេះ កូនដំរី«ឈូក» បានប្រើប្រាស់ជើងសិប្បនិម្មិត្ត បន្ទាប់ពីវាត្រូវបានជួយសង្គ្រោះ និងនាំទៅរក្សាទុកនៅក្នុងឧទ្យានសង្គ្រោះសត្វព្រៃភ្នំតាម៉ៅ។
លោក នេត្រ ភក្ត្រា បានអះអាងនៅក្នុងអត្ថបទនោះថា ដំរីជាង ៥០០ក្បាល ត្រូវបានប៉ាន់ប្រមាណថា កំពុងរស់នៅក្នុងប្រទេសកម្ពុជា ក្នុងនោះដំរី ៣៧៥ក្បាលនៅខេត្តមណ្ឌលគិរី និងដំរីជិត ២០០ក្បាលទៀតនៅតំបន់ជួរភ្នំក្រវ៉ាញ៕
