មន្ត្រីជាន់ខ្ពស់សាលាដំបូងខេត្តឧត្តមានជ័យអះអាងថា ខ្លួននឹងចេញដីកាឱ្យសមត្ថកិច្ចតាមចាប់ខ្លួនអតីតប្រធានគណបក្សសង្គ្រោះជាតិប្រចាំខេត្តនេះ ពាក់ព័ន្ធនឹងបទចោទថា «រួមគំនិតក្បត់» ប្រឆាំងរដ្ឋាភិបាល ។
កាលពីម្សិលមិញ សាលាដំបូងខេត្តឧត្តរមានជ័យ បានចេញប្រកាសមួយ បញ្ជាក់ថាខ្លួនសម្រេចចោទ លោក ម៉ោញ សារ៉ាត ពីបទ «រួមគំនិតក្បត់» ដែលលោក ម៉ោញ សារ៉ាត់ ជាប្រធានក្រុមការងារប្រចាំខេត្តឧត្តមានជ័យរបស់គណបក្សសង្គ្រោះជាតិមុនពេលតុលាការកំពូលរំលាយ ។
តុលាការខេត្តឧត្តមានជ័យ អះអាថា ការចោទប្រកាន់នេះ ដោយសារលោក ម៉ោញ សារ៉ាត់ បានធ្វើបទសម្ភាសជាមួយវិទ្យុសំឡេងសហរដ្ឋអាម៉េរិក VOA កាលពីថ្ងៃទី២៦កញ្ញា ថាបានកៀរគរប្រជាពលករដែលបានធ្វើចំណាកស្រុកទៅប្រទេសថៃ ឱ្យចូលរួមក្នុងផែនការផ្តួលរំលំរដ្ឋាភិបាល ពេលលោក សម រង្ស៊ី មកកម្ពុជា នៅថ្ងៃទី៩វិច្ឆិកា ឆ្នាំ២០១៩។
ប្រធានលេខាធិការដ្ឋានរដ្ឋបាលនៃសាលាដំបូងខេត្តឧត្តមានជ័យ លោក ហង់ ហ៊ីដ្ក្រា អះអាងថា ដីកាបង្គាប់ឱ្យតាមចាប់ខ្លួនជនង្ស័យនឹងចេញឆាប់ៗដោយថា ព្រះរាជអាជ្ញា បានស្នើចៅក្រមស៊ើបរួចហើយ។
លោកថា៖«ចៅក្រមស៊ើបប្រហែលអត់ទាន់ចេញដីកាចាប់ទេ ព្រោះក្នុងលក្ខណដែលគាត់កំពុងតែចាត់ការ ហើយព្រះរាជអាជ្ញាបានសុំឱ្យចេញដីកាចាប់ហើយ»។
លោក ម៉ោញ សារ៉ាត់ ដែលកំពុងនិរទេសខ្លួន បានច្រានចោលការចោទប្រកាន់នេះ ដោយអះអាងថា តុលាការជាឧបករណ៍នយោបាយរបស់បក្សកាន់អំណាច មិនដែលផ្តល់យុត្តិធម៌ដល់អ្នកនយោបាយប្រឆាំងឡើយ ។
ប៉ុន្តែអតីតមន្រ្តីបក្សប្រឆាំងរូបនេះ អះអាងថា អ្វីដែលលោកកៀរគរ ពលរដ្ឋឱ្យទៅទទួលលោក សម រង្ស៊ី ជាការជំរុញរដ្ឋាភិបាលឱ្យងាកមកផ្សះផ្សាជាតិ ដើម្បីបញ្ចៀសការដាក់ទណ្ឌកម្មពីសហគមន៍អន្តរជាតិ ។
លោកថា៖ « យើងចង់ឱ្យកម្ពុជាហ្នឹងគោរពគោលការណ៍ប្រជាធិបតេយ្យ គោរពសិទ្ធិមនុស្សឱ្យវាប្រសើរឡើង។ អាហ្នឹងយើងធ្វើឱ្យឆ្លើយតបទៅនឹងអ្វីដែលជាការទាមទាររបស់សហគមន៍អន្តរជាតិដែលគេចង់ឃើញកម្ពុជាហ្នឹងគោរពគោលការណ៍ប្រជាធិបតេយ្យ ហើយកុំឱ្យមានការគំរាមកំហែងនូវសិទ្ធិសេរីភាពរបស់គណបក្សប្រឆាំងដូចកំពុងកើតមានដូចបច្ចុប្បន្ននេះ» ។
គិតត្រឹមថ្ងៃអង្គារនេះអតីតសកម្មជនគណបក្សប្រឆាំងជាង៣០នាក់ ត្រូវបានចាប់ឃុំខ្លួនចោទពីបទរួមគំនិតក្បត់ ពាក់ព័ន្ធទៅនឹងការបង្ហាញជំហរគាំទ្រដំណើរវិលត្រឡប់របស់លោក សម រង្ស៊ី មកកម្ពុជាវិញនេះ។
អ្នកនាំពាក្យសមាគមអាដហុកលោក ស៊ឹង សែនករុណា ហៅការចាប់ខ្លួនអតីតមន្រ្តីគណបក្សប្រឆាំងនេះថា មានលក្ខណៈជាប្រព័ន្ធ ។
អតីតអនុប្រធានគណបក្សសង្គ្រោះជាតិលោកស្រី៏ មូរ សុខហួរ ចាត់ទុកការចោទប្រកាន់នេះ ថាជាលេសដើម្បីបន្តគាបសង្កត់គណបក្សប្រឆាំង និងពលរដ្ឋដែលចង់ឃើញមានការស្តារស្ថានភាពសិទ្ធិមនុស្សនិងប្រជាធិបតេយ្យតែប៉ុណ្ណោះ។
លោកស្រី ថា៖ «ការដាក់មាតុភូមិនិវត្តន៍ថាជាការក្បត់ជាតិនេះគឺជាលេសមួយសម្រាប់បន្តការជិះជាន់ និងបិទសិទ្ធិប្រជាពលរដ្ឋ»។
អតីតមេដឹកនាំបក្សប្រឆាំងរូបនេះ អះអាងថា ការវិលត្រឡប់របស់លោក សម រង្ស៊ី និងថ្នាក់ដឹកនាំមួយចំនួនមកកម្ពុជានៅថ្ងៃទី៩វិច្ឆិកាខាងមុខដើម្បីជំរុញឲ្យមានការផ្សះផ្សាជាតិ ដើម្បីបញ្ចៀសកម្ពុជាពីការដាក់ទណ្ឌកម្មពីសហគមន៍អន្តរជាតិ គ្មានបំណងចង់ផ្តួលរំលំរដ្ឋាភិបាលដូចការចោទប្រកាន់ទេ។
ក្រសួងយុត្តិធម៌កាលពី ថ្ងៃទី២០កញ្ញា បានចេញសេចក្តីថ្លែងការណ៍មួយថា សារនយោបាយរបស់លោក សម រង្ស៊ី ជាការប៉ុនប៉ងធ្វើរដ្ឋប្រហា តាមរយៈការប្រើប្រាស់វិធីញុះញង់ ដើម្បីអូសទាញកម្លាំងប្រដាប់អាវុធរបស់ជាតិ ឱ្យបះបោរតាមរូបភាពជាបដិវត្តន៍ដោយហិង្សា ក្នុងគោលដៅផ្តួលរំលំរដ្ឋាភិបាល ក្រោមរូបភាពប្រជាធិបតេយ្យ៕
