សាលាដំបូងខេត្តកំពង់ចាម នៅថ្ងៃនេះ បានសម្រេចចោទប្រកាន់អតីតប្រធានយុវជនគណបក្សសង្គ្រោះជាតិលោក ដុង សុវណ្ណារិទ្ធិ ពីបទរួមគំនិតក្បត់។
ក្នុងសេចក្ដីប្រកាសព័ត៌មានចុះថ្ងៃទី០១ ខែតុលា ឆ្នាំ២០១៩ អ្នកនាំពាក្យសាលាដំបូងខេត្តកំពង់ចាម ឱ្យដឹងថា អយ្យការអមសាលាដំបូងខេត្តកំពង់ចាម សម្រេចចោទប្រកាន់ លោក ដុង សុវណ្ណារិទ្ធិ ពីបទ រួមគំនិតក្បត់។
សេចក្ដីប្រកាស ដដែលថា ការចោទប្រកាន់លោក ដុង សុវណ្ណារិទ្ធិ បន្ទាប់ពីលោកកៀរគរ និងធ្វើការប្រមូលផ្ដុំប្រជាពលរដ្ឋនៅស្រុកបាធាយ ធ្វើការផ្សព្វផ្សាយ និងថតរូបលើកម្រាមដៃជាសញ្ញាក្នុងការគាំទ្រ លោក សម រង្ស៊ីវិលចូលកម្ពុជានៅថ្ងៃទី៩ ខែវិច្ឆិកា ខាងមុខនេះ។
ភរិយាលោក ដុង សុវណ្ណារិទ្ធិ គឺអ្នកស្រី ញ៉ន សុខកៀង ចាត់ទុកការចោទប្រកាន់របស់តុលាការថាជារឿងអយុត្តិធម៌ ដោយអ្នកស្រីថា ចាប់តាំងពីតុលាការរំលាយគណបក្សសង្គ្រោះជាតិមក ស្វាមីរបស់គាត់មិនដែលធ្វើសកម្មភាពនយោបាយអ្វីនោះទេ។
អ្នកស្រី បន្តថា៖«ជូនកាលគេលើកដៃលេងក៏មិនដឹង ហើយយើងគ្រាន់តែឃើញគេលើកម្រាមដៃ ៩ គិតដល់ថ្ងៃ ៩ វិច្ឆិកា ។អានេះនិយាយរួមចិត្តគាត់គិតតាមមាត់គាត់ធ្វើ តាមគាត់ថា។ គាត់ចោទម៉េច តាមគាត់ពិបាកណាស់ព្រោះ ច្បាប់នៅលើគាត់ហើយ។ អត់មានទេ តាំងពីរំលាយគណបក្សមកគាត់មិនដែលធ្វើអីផង គាត់គិតតែពីរកស៊ី លក់ដូរ មិនដែលទៅណាទេ មានជួបមិត្តភក្តិពួកម៉ាក់ មីងមា ផ្ទះបងប្អូនអ៊ីចឹង តែបើជួបរឿងការងារខាងគណបក្សបង្ហោះអីមិនដែរទេ ព្រោះហាមតាំងពីរំលាយគណបក្សមក»។
អតីតប្រធានយុវជនគណបក្សសង្រ្គោះជាតិ លោក ដុង សុវណ្ណារិទ្ធិ ត្រូវបានសមត្ថកិច្ចខេត្តកំពង់ចាម ចាប់ខ្លួននៅថ្ងៃទី០១ ខែតុលា ឆ្នាំ ២០១៩ ខណៈលោកកំពុងបរិភោគអាហារពេលព្រឹកនៅផ្ទះ។
អតីតមេដឹកនាំគណបក្សប្រឆាំងលោក សម រង្ស៊ី កាលពីថ្ងៃទី២៣ ខែកញ្ញា ឆ្នាំ២០១៩ បានប្រកាសឱ្យអតីតមន្ត្រីនិងសកម្មជនបក្សសង្គ្រោះជាតិទាំងអស់ធ្វើយុទ្ធនាការលើកម្រាមដៃ៩ ជាសញ្ញាគាំទ្រការវិលចូលមកកម្ពុជារបស់លោកនៅថ្ងៃទី៩ ខែវិច្ឆិកា ខាងមុខនេះ។
គិតត្រឹមថ្ងៃទី១ ខែតុលា នេះ មានអតីតសកម្មជននិងអ្នកគាំទ្របក្សប្រឆាំងចំនួន៣១នាក់ ត្រូវបានចាប់និងឃុំខ្លួន ហើយ១៤នាក់ត្រូវបានតុលាការចោទប្រកាន់ពីបទរួមគំនិតក្បត់ ដែលត្រូវជាប់ពន្ធនាគារពី៥ឆ្នាំទៅ១០ឆ្នាំ តាមមាត្រា៤៥៣នៃក្រមព្រហ្មទណ្ឌ។
បុគ្គលដែលត្រូវជាប់ចោទពី «បទរួមគំនិតក្បត់» តាមមាត្រា៤៥៣នៃក្រមព្រហ្មទណ្ឌ ត្រូវផ្តន្ទាទោសពី ៥ឆ្នាំ ទៅ ១០ឆ្នាំ ហើយបើបុគ្គលនោះជាមន្រ្តីសាធារណៈត្រូវជាប់ទោសពី១០ឆ្នាំ ទៅ ២០ឆ្នាំ៕
