ចិនបានដាក់ពាក្យប្តឹងទៅអង្គការពាណិជ្ជកម្មអន្តរជាតិ(WTO) ជាលើកទី៣ដើម្បីទាមទារឱ្យស្ថាប័នអន្តរជាតិមួយនេះជួយស្វែងរកយុត្តិធម៌ ករណីអាមេរិកដាក់ទណ្ឌកម្មដំឡើងពន្ធលើទំនិញចិន ដែលប៉ះពាល់រាប់ពាន់លានដុល្លារ។
ក្រសួងពាណិជ្ជកម្មរបស់ចិនបានចេញសេចក្តីថ្លែងការណ៍កាលពីម្សិលមិញដោយបញ្ជាក់ថា ប្រធានាធិបតីសហរដ្ឋអាមេរិកលោកដូណាល់ ត្រាំបានបំពានគោលការណ៍ច្បាស់លាស់របស់អង្គការពាណិជ្ជកម្មអន្តរជាតិក្នុងការកំណត់ពន្ធ។
កាលពីថ្ងៃថ្ងៃទី១ខែកញ្ញា សហរដ្ឋអាមេរិកបានសម្រេចដំឡើងពន្ធ១៥ភាគរយបន្ថែមទៀតលើផលិតផលរបស់ចិន។ ភ្លាមៗនោះចិនក៏បានដាក់ទណ្ឌត្រឡប់វិញដោយដំឡើងពន្ធនាំទំនិញចូលពីសហរដ្ឋអាមេរិកពិសេសលើប្រេងឆៅ ធ្វើឱ្យជម្លោះពាណិជ្ជកម្មកាន់តែតានតឹងឡើងថែមមួយកម្រិតទៀត។
ទោះយ៉ាងណាចិនមិនបានបញ្ជាក់លម្អិតពីវិធានការផ្លូវច្បាប់ប្តឹងទៅកាន់អង្គការអន្តរជាតិនេះទេ គ្រាន់តែបញ្ជាក់ថា អាមេរិកដំឡើងពន្ធបន្ថែមនេះធ្វើឱ្យចិនខាតបង់អស់៣០០ប៊ីលានដុល្លារ។
ក្រសួងពាណិជ្ជកម្មរបស់ចិនបញ្ជាក់ថា វិធានការដំឡើងពន្ធថ្មីៗនេះ ជាការបំពានលើការព្រមព្រៀងរវាងមេដឹកនាំអាមេរិក និងចិននៅ Osaka។ ក្នុងសេចក្តីថ្លែងការណ៍ក៏បានបញ្ជាក់ទៀតថា ចិននឹងប្រើប្រាស់ខ្លឹមសារច្បាប់របស់អង្គការពាណិជ្ជកម្មអន្តរជាតិក្នុងការតតាំងជាមួយអាមេរិក។
ចំណែកខាងសហរដ្ឋអាមេរិកវិញបញ្ជាក់ថា ចិនមានកំហុសក្នុងការលួចកម្មសិទ្ធិបញ្ញារបស់អាមេរិកនាំឱ្យមានការដាក់ទណ្ឌកម្មដំឡើងពន្ធនេះ ដូច្នេះច្បាប់របស់អង្គការពាណិជ្ជកម្មអន្តរជាតិមិនអាចការពារចិនបានទេ។
អ្នកជំនាញនានាបានលើកឡើងថា ចិននិងអាមេរិកបានដាក់ទណ្ឌកម្មគ្នាទៅវិញទៅមក កំហឹងទល់កំហឹងនេះ ហើយមិនមានការសម្របសម្រួលពីអង្គការពាណិជ្ជកម្មអន្តរជាតិនោះមិនមែនជារឿងត្រឹមត្រូវ ហើយមិនអាចដោះស្រាយបញ្ហាជម្លោះនេះបានទេ។
សង្គ្រាមពាណិជ្ជកម្មរវាងអាមេរិក និងចិន ចាប់ផ្តើមឡើងតាំងពីខែកក្កដា ឆ្នាំ២០១៨ គឺអាមេរិកបានចោទថា ចិនលួចកម្មសិទ្ធិបញ្ញា ឬ លួចផលិតទំនិញហើយប្រើឈ្មោះ និងម៉ាកទំនិញរបស់អាមេរិកដើម្បីយកទៅលក់នៅលើទីផ្សារ។ ពេលនោះអាមេរិកចាប់ផ្តើមដំឡើងពន្ធនាំចូលទំនិញពីចិន ចំណែកចិនក៏ចាប់ផ្តើមដំឡើងពន្ធនាំចូលពីអាមេរិកដែរ។
ក្រោយពីសង្គ្រាមពាណិជ្ជកម្មផ្ទុះឡើង មេដឹកនាំចិន និងអាមេរិកធ្លាប់បានប្រជុំជជែកគ្នា ចំណែកមន្ត្រីជំនាញរបស់ប្រទេសទាំងពីរក៏បានប្រជុំគ្នាស្វែងរកដំណោះស្រាយជាបន្តបន្ទាប់ ប៉ុន្តែហាក់មិនមានដំណោះស្រាយអ្វីធំដុំនោះទេ។
សង្គ្រាមពាណិជ្ជកម្មរវាងចិននិងអាមរិកនេះ មិនមែនប៉ះពាល់តែប្រទេសទាំងពីរនោះទេ គឺប្រទេសឬក្រុមហ៊ុនដែលមានមុខជំនួញពាក់ព័ន្ធប្រទេសទាំងពីរក៏ប្រឈមការខាតបង់ដែរ។