សាលាដំបូងរាជធានីភ្នំពេញ បានចេញដីកាបង្គាប់ការឃុំខ្លួន លោក គិត ធាង ជាបណ្ដោះអាសន្ននៅរសៀលថ្ងៃនេះ។
ប្រធានលេខាធិការដ្ឋានរដ្ឋបាល និងជាអ្នកនាំពាក្យសាលាដំបូងរាជធានីភ្នំពេញ លោក អ៊ី រិន មានប្រសាសន៍ប្រាប់ វីអូឌី លោក គិត ធាង ត្រូវបានចោទប្រកាន់ពីបទ «ចាត់ចែង សម្រួលឲ្យមានការប្រើប្រាស់ដោយខុសច្បាប់នូវសារជាតិញៀន និងបទសមគំនិត» ដែលប្រព្រឹត្តនៅមណ្ឌលកម្សាន្តរ៉ក់ កាលពីថ្ងៃទី២៣ ខែកុម្ភៈ ឆ្នាំ២០១៩។ ប្រភពដដែលឲ្យដឹងថា លោក គិត ធាង ត្រូវបានបញ្ជូនទៅឃុំខ្លួនបណ្តោះអាសន្ននៅពន្ធនាគារ PJ ដើម្បីរង់ចាំជំនុំជម្រះជាក្រោយតាមនីតិវិធី។
លោក គិត ធាង ដែលជាបងប្រុសលោក គិត ម៉េង ប្រធានសម្ព័ន្ធក្រុមហ៊ុន Royal Group ត្រូវបានសមត្ថកិច្ចឃាត់ខ្លួនតែប៉ុន្មានម៉ោងប៉ុណ្ណោះ ក្រោយពីលោកនាយករដ្ឋមន្ត្រី ហ៊ុន សែន បានបញ្ជាឲ្យស្វែងរកចាប់ខ្លួនមេខ្លោងស្ថិតនៅពីក្រោយនៃគ្រឿងញៀន ដែលត្រូវបានរឹបអូសបាននៅមជ្ឈមណ្ឌលកម្សាន្តរ៉ក់កាលពីខែកុម្ភៈកន្លងមកនេះ៕
